Keiingi bir táýlikte Qazaqstanda koronavirýs (KVI+) juqtyrǵany zerthanada anyqtalǵan 6233 naýqas, al PTR nátijesi teris (KVI-) bolsa da, klinikalyq belgisi Covid-ke uqsas "kovidtektes pnevmoniia" diagnozymen 322 adam tirkelgen.
Senbi kúni Qazaqstan densaýlyq saqtaý ministrligi jariialaǵan resmi derekte koronavirýs saldarynan 104 adam, "kovidtektes pnevmoniiadan" 27 adam kóz jumǵany aitylǵan.
Pandemiia bastalǵaly Qazaqstanda Covid-19 juqtyrǵan 8983 adam, al "kovidtektes pnevmoniiadan" 4364 adam kóz jumǵan. Alaida kei sarapshylar indet saldarynan qaitys bolǵandar sany resmi derekten anaǵurlym kóp bolýy múmkin deidi.
Densaýlyq saqtaý ministrliginiń dereginshe, qazir 115 myńdai adam koronavirýstan emdelip jatyr, onyń 25 myńnan astamy – statsionarda. 1800-den astam adamnyń jaǵdaiy aýyr, 500-den kóbi asa aýyr halde, al 308 naýqas ókpe jeldetkish apparatqa qosylǵan.
Pandemiia bastalǵaly beri Qazaqstanda koronavirýs juqtyrǵan 774 myń naýqas tirkelgen, onyń 656 myńnan astamy dertten aiyqqan.
Biyl jazda elde indet órship, naýqas pen ólim-jitim kóbeigen. Densaýlyq saqtaý salasy basshylary buǵan koronavirýstyń jyldam juǵatyn "Delta" variantynyń taralýy, oǵan qosa jurttyń qaýipsizdik erejelerin, maska rejimin saqtamaýy sebep boldy dep túsindiredi.
Qazir Qazaqstannyń túgelge derlik aimaǵy koronavirýs ahýalyna bailanysty "qyzyl aimaqta", jalǵyz Túrkistan oblysy ǵana "jasyl aimaqta" tur.
28 tamyzdaǵy málimet boiynsha Qazaqstanda koronavirýs infektsiiasyna qarsy vaktsinanyń 1-shi komponentin - 6 564 783, 2-shi komponentin 5 283 826 adam saldyrǵan.
Elde qazir negizinen Reseide ázirlenip, Qaraǵandy zaýytynda shyǵarylǵan "Spýtnik V" vaktsinasy jáne qazaqstandyq QazVac ekpesi qoldanylady. Sonymen birge tamyz aiynda elge jetkizilgen Qytaidyń Sinopharm kompaniiasy ázirlegen Vero Sell vaktsinasyn da salyp jatyr.
Amerikalyq Djons Hopkins ýniversiteti málimeti boiynsha, álemde Covid juqtyrǵandardyń resmi sany 215 millionnan asty, 4,4 mln-nan astam adam kóz jumdy.
