Dáriger kýbalyq "Soberana 2" vaktsinasynyń qutysyn ustap tur.
Juma, 3 qyrkúiekte Kýba úkimeti 2-18 jas aralyǵyndaǵy balalarǵa koronavirýs vaktsinasyn salý naýqanyn bastady. Eldiń kommýnistik biligi bul qadam koronavirýs indeti ýshyqqan tusta mektepterdi qaita ashý úshin baryp otyr. Bul týraly AFP agenttigi habarlady.
Vaktsinany aldymen 12 jastan asqandarǵa salady, kishkentai balalardyń kezegi sodan keiin keledi. Olarǵa "Abdala" jáne Soberana" deitin kýbalyq ekpe salynady.
Kýbada mektepter 2020 jylǵy naýryzdan beri jabyq tur. Oqýshylar osy kúnge deiin telesabaqtar arqyly oqyp keldi. Oqý jyly dúisenbi, 6 qyrkúiek kúni bastalǵanymen vaktsinalaý tolyq aiaqtalǵansha qashyqtan oqý jalǵasa beredi.
3 qyrkúiektiń keshinde Kýbanyń dárilerdi retteý agenttigi "Soberana 2" vaktsinasyn 2-18 jastaǵy balalar úshin tótenshe qoldanýdy maquldaǵanyn málimdedi.
Kýba vaktsinalary rekombinantty aqýyz negizinde jasalǵan. Amerikalyq Novavax kompaniiasy da osy ádiske súiengen. Biraq Kýba vaktsinalary DDSU maquldaýyn almaǵan.
11,2 million million halqy bar Kýbada osy kúnderi koronavirýstyń "delta" varianty qatty tarap, densaýlyq saqtaý júiesi quldyraýdyń aldynda tur.
Indet bastalǵaly elde koronavirýstan 5,3 myń adam qaitys bolsa, sonyń jartysy tamyz aiynda tirkelgen. Koronavirýs naýqastarynyń úshten biri bóligi de infektsiiany osy tamyzda juqtyrǵan.
Úkimet balalarǵa vaktsina salýdy qazan aiyna qarai aiaqtap, sol kezde mektep esigin ashýdy josparlap otyr.
