Qazaqstanda taǵy da 8 myńǵa jýyq adamǵa koronavirýs pen "kovidtektes pnevmoniia" diagnozy qoiyldy. Bul týraly senbi, 14 tamyz kúni densaýlyq saqtaý ministrligi habarlady.
Resmi derekke sai, 7510 adamnyń PTR test qorytyndysy koronavirýs (KVI+) juqtyrǵanyn anyqtaǵan. 121 naýqas qaitys bolǵan.
PTR testi teris (KVI-) shyqqan 408 adamǵa "kovidtektes pnevmoniiasy" diagnozy qoiylǵan. 21 adam osy dertten kóz jumǵan.
Qazaqstanda biyl jazda indet qaita órshidi. Densaýlyq saqtaý ministrliginiń dereginshe, qazir koronavirýs jáne "kovidtektes pnevmoniia" diagnozy qoiylǵan 116 myńnan astam adam emdelip jatyr. Onyń 31 myńǵa jýyǵy statsionarda, 85 669 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
• 1 924 adamnyń jaǵdaiy aýyr,
• 505 patsienttiń jaǵdaiy óte aýyr,
• 253 naýqas ÓJJ apparatynda jatyr.
Naýqastar Almaty qalasy (1519), Qaraǵandy oblysy (1009) jáne Nur-Sultan qalasynda (998) kóp.
Dárigerler indettiń órshýin koronavirýstyń asa juqpaly ári qaýipti "Delta" variantymen bailanystyrady. Eń alǵash ret Úndistanda anyqtalǵan "Delta" Qazaqstanda maýsymnyń aiaǵynda tirkelgen.
Álemde pandemiia bastalǵaly beri Qazaqstanda 680 myńǵa jýyq adamnyń koronavirýs testi oń (KVI+) shyqqan. 560 myńan astamy dertinen aiyqqan.
Buǵan qosa PTR testi teris (KVI-) nátije kórsetken, biraq "kovidektes pnevmoniia" degen diagnoz qoiylǵan naýqastardyń esebi bar. Úkimet ol esepti byltyr 1 tamyzda bastaǵan. Sodan beri 65 myńnan astam adamǵa osyndai diagnoz qoiylǵan. 56 myńnan astam adam jazylǵan.
Qazaqstanda resmi esep boiynsha, 2020 jyldyń naýryzynan beri 7434 adam koronavirýstan kóz jumǵan. Byltyrǵy tamyz aiynan beri "kovidtektes pnevmoniiadan" 4016 adam marqum bolǵan.
Kei sarapshylar koronavirýs boiynsha resmi málimetke senbei, virýs juqtyrǵandar men odan qaitys bolǵandardyń shynaiy sany budan áldeqaida kóp dep sanaidy.
Qazaqstanda aqpan aiynan beri halyqqa koronavirýsqa qarsy vaktsina salynyp jatyr. Densaýlyq saqtaý ministrliginiń dereginshe, sodan beri vaktsinanyń 1-shi komponentin 6 044 062 adam, 2-shi komponentin 4 668 157 adam saldyrǵan.
Djons Hopkins ýniversitetiniń málimetinshe, indet bastalǵaly beri álemde 205 millionnan astam adamǵa koronavirýs juqqan. 4,3 mln adam qaitys bolǵan.
