Ótken táýlikte Qazaqstanda koronavirýs juqtyrǵan 5 222 adam tirkeldi. 28 tamyzda testi keri nátije berse de, klinikalyq belileri boiynsha "kovidtektes pnevmoniia" diagnozy qoiylǵan 63 naýqas esepke alyndy.
Qazaqstanda koronavirýs indetiniń kezekti tolqyny júrip jatyr, bilik ókilderiniń aitýynsha, buǵan inkýbatsiialyq kezeńi óte qysqa "delta" shtamynyń keń taraýy sebep. Onyń taǵy bir aiyrmasy – koronavirýstan jastar da qatty aýyrýy múmkin.
Qazir virýs taraý jyldamdyǵy boiynsha Túrkistan oblysynan basqa óńirlerdiń bári "qyzyl aimaqta" tur.
30 tamyz tańdaǵy resmi derek boiynsha, indet bastalǵaly koronavirýs juqtyrǵany zerthanada dáleldengen 785 myńnan astam naýqas tirkelgen. Osy aýrýdan 9 222 adam qaitys bolǵan. Keshe koronavirýstan taǵy 104 adam, al oǵan uqsas pnevmoniiadan 20 adam kóz jumdy.
Byltyrǵy 1 tamyzdan bergi resmi statistikaǵa sensek, "kovidtektes pnevmoniiamen" aýyrǵan 69 693 adam tirkelgen, 4 406 adam qaitys bolǵan.
Qazir Qazaqstanda 116 myńdai adam koronavirýs pen oǵan uqsas pnevmoniiadan emdelip jatyr. 1 793 naýqastyń hali nashar, 495-iniń jaǵdaiy óte nashar, 232 adam ókpe jeldetý apparatyna qosylǵan.
Sondai-aq, 29 tamyzdaǵy málimet boiynsha, elde koronavirýs infektsiiasyna qarsy vaktsinanyń 1-shi komponentin - 6 611 018, 2-shi komponentin 5 339 029 adam saldyrǵan.
AQSh-taǵy Djons Hopkins ýniversitetiniń deregi boiynsha, álemde 216 millionnan astam adam koronavirýs juqtyrǵan, 4,5 million naýqas osy dertten qaitys bolǵan.
