5 tamyzda Qazaqstanda 7769 adamnyń analizinen koronavirýs anyqtaldy. Densaýlyq saqtaý ministrliginiń juma kúngi habarlamasynda osyndai málimet kórsetilgen.
Elde aqpan aiynan beri vaktsinalaý naýqany júrip jatqanyna qaramastan indettiń beti qaitpai tur. Keiingi aptada naýqastar men adam ólimi boiynsha rekordtyq kórsetkishter tirkelip jatyr. Beisenbi kúni Nur-Sultan men Almatyda árqaisysynda – 1507, Qaraǵandy oblysynda – 1038, Shymkentte – 549 adamnan koronavirýs tabylǵan. Qalǵan oblystarda bir kúnde anyqtalǵan naýqastar 400-ge jetpeidi.
Qazir Túrkistan oblysy koronavirýstyń taraýy boiynsha "jasyl aimaqta" tur. Qalǵan oblystar men qalalar "qyzyl aimaqta".
Elde koronavirýspen bailanysty adam óliminiń kórsetkishi joǵary. 4 tamyzda 155 adam koronavirýstan qaitys bolǵan: 26-sy koronavirýs pnevmoniiasynan kóz jumǵan dep aitylady.
Osy aptada densaýlyq saqtaý salasynyń mamandary adam óliminiń kóbeiýine koronavirýstyń delta variantynyń jyldam taralýy jáne vaktsinalaýdyń baiaýlyǵy sebep dep málimdegen.
2020 jyldyń naýryz aiynan ber 618 myń adamnyń koronavirýs testi oń kórsetken. 6531-i qaitys bolǵan.
Qazaqstan biligi pnevmoniianyń koronavirýsqa uqsas túrin 2020 jyldyń tamyzynan beri eseptep keledi. Sodan beri 62 myń adamǵa sondai diagnoz qoiylǵan (4 tamyzda 413 adam kornavirýs pnevmoniiasyna shaldyqqan), 3840-i qaitys bolǵan.
6 tamyzdaǵy aqparat boiynsha, 107 807 adam koronavirýs infektsiiasynan (–104 321 + jáne 3 486 KVI-) emdelip jatyr. Olardyń ishinde 30 139 patsient statsionarda, 77 668 naýqas ambýlatoriialyq deńgeide em qabyldap júr.
KVI+, KVI- shaldyqqandardyń arasynda:
1 884 adamnyń jaǵdaiy aýyr,
400 patsienttiń jaǵdaiy óte aýyr,
187 naýqas ÓJJ apparatynda jatyr.
Resmi málimet boiynsha, Qazaqstan halqynyń 30 paiyzǵa jýyǵy koronavirýsqa qarsy vaktsinanyń eki dozasyn alǵan: 4,2 mln adamǵa eki dozasy salynǵan, 1,4 mln adam bir dozasyn alǵan.
