Ótken táýlikte 2711 adamnyń koronavirýs testi oń shyqty. Bul bir kún burynǵy kórsetkishten 93 adamǵa kóp. Elde "úndistandyq shtamnyń" taraǵany jaily aqparat shyqqaly beri koronavirýs juqtyrǵandar úzdiksiz kóbeiip kele jatyr.
Resmi málimet boiynsha, 2020 jyldyń naýryz aiynan beri 442 291 adamnyń koronavirýs testi oń shyqqan.
5 shildede 27 adam pnevmoniianyń koronavirýsqa uqsas túrine shaldyqqan. PTR nátijesi teris, biraq simptomdary koronavirýsqa uqsas "pnevmoniia" statistikasy byltyr tamyzdan beri júrgizilip keledi. Ministrlik málimetinshe, sodan beri elde 57 464 adam "pnevmoniianyń" sol túrine shaldyqqan.
Dúisenbi kúni elde koronavirýspen bailanysty 30 adam ólimi tirkelgen: 27 adam – koronavirýstan, 3 adam – koronavirýs pnevmoniiasynan qaitys boldy dep aitylady. Indet bastalǵaly beri koronavirýstan – 4516 adam, koronavirýs pnevmoniiasynan 3470 adam qaitys bolǵan.
Koronavirýsqa qatysty adam ólimi statistikasyna virýsqa shaldyqqan myńnan asa adam marqum enbei qaldy. Ministrlik qurǵan komissiia olardyń qazasyna basqa dert sebep boldy dep tapqan.
Qazir elde Nur-Sultan, Almaty, Shymkent qalalary, Aqmola, Atyraý, BQO, Qaraǵandy, Mańǵystaý jáne Pavlodar oblystary qaýpi kóp "qyzyl aimaqta", Aqtóbe, Qostanai, SQO, Qyzylorda, Almaty, Jambyl oblystary virýs taraýy jaǵynan ortasha "sary aimaqta" tur. Qalǵan oblystar "jasyl aimaqta".
7 shilde kúngi aqparat boiynsha, 34 189 adam (32 876 adamnyń Covid testi oń shyqqan) koronavirýstan emdelip jatyr. Statsionarda 10 708-i emdelip jatyr. 710 adamnyń jaǵdaiy aýyr, 143 naýqastyń jaǵdaiy óte aýyr, 75 adam jasandy tynys apparatyna qosylǵan.
Ministrliktiń dereginshe, 7 shildege deiin 3 mln 906 myń adam koronavirýsqa qarsy ekpeniń bir dozasyn; 2 mln 236 myń adam eki dozasyn da alǵan. Elde reseilik "Spýtnik V", qazaqstandyq QazVac, HayatVax (BAÁ elinde daiyndalǵan Qytaidyń ekpesi), qytailyq Coronavac ekpesin salyp jatyr.
2 shildede Qazaqstan densaýlyq saqtaý ministrligi koronavirýstyń tez juǵatyn túri "úndistandyq shtamm" barlyq oblys pen qalada anyqtaldy dep málimdegen.
AQSh-taǵy Djons Hopkins ýniversitetiniń esebinshe, indet bastalǵaly beri álemde 184,5 mln adam Covid dertine shaldyqqan. 3,9 mln adam qaitys bolǵan.
