Qazaqstanda koronavirýs pen pnevmoniia statistikasy biriktiriletin boldy. Osyǵan qatysty «Astana» meditsinalyq ýniversitetiniń profilaktikalyq meditsina jáne tamaqtaný kafedrasynyń meńgerýshisi Erbolat Dálenov pikir bildirdi, dep habarlaidy QazAqparat.
«Densaýlyq saqtaý ministriniń osyndai sheshim shyǵarǵany durys boldy. Dúniejúzilik densaýlyq saqtaý uiymy da jazdy kúni bolatyn pnevmoniianyń 80-90%-y koronavirýs ekenin aitqan bolatyn. Sovid-19 pen pnevmoniia bir aýrý bolǵandyqtan emdeý joly da birdei bolýy kerek. Emdeý joly birdei bolǵanda ǵana dertti jeńe alamyz», - deidi Erbolat Dálenov.
Onyń aitýynsha, budan keiin mazmundy ári durys jumys bolady.
«Bul pnevmoniianyń qarapaiym pnevmoniiadan aiyrmashylyǵy - dene qyzýy bolmaityndyqtan ókpe qabynyp, qyzmetin toqtatqanyn adam sezbei qalady. Dene qyzýy 38-39 bolǵan kezde pirogendi zattar bólinedi. Ol jaqsy bólinse adamdy tabiǵi jolmen aman alyp qalady. Immýniteti álsiz adamda pirogendi zattar az bólinip, pnevmoniiaǵa ainalyp ketedi», - deidi ol.
Eske sala keteiik, keshe QR Prezidenti Qasym-Jomart Toqaev Úkimetke pandemiianyń statistikasyn birizdendirýdi mindettegen bolatyn. Búgin Qazaqstanda koronavirýs pen pnevmoniia statistikasy biriktiriletini habarlandy.
