QR vitse-premeri Eraly Toǵjanov COVID-19-ǵa qarsy qazaqstandyq vaktsinanyń klinikalyq zertteýleriniń II kezeńiniń aiaqtalǵanyn málim etti, dep habarlaidy "Ult aqparat".
Almaty qalasyna jumys sapary aiasynda Eraly Toǵjanov aǵymdaǵy jyldyń qazan aiynda paidalanýǵa berilgen qalalyq klinikalyq balalar infektsiialyq aýrýhanasynyń modýldik filialyna bardy.
Almaty ákiminiń orynbasary Erjan Babaqumarov COVID-19 jaǵdaiynda jumys isteý úshin densaýlyq saqtaý júiesi infraqurylymynyń daiyndyǵy týraly baiandady. Qalada búginde 7 011 tósek-orynǵa arnalǵan 23 statsionarda, 74 emhana bazasynda patsientterdi kóshpeli (jyljymaly túrde) monitoringteý úshin 298 mobildi brigada jumys isteidi, sondai-aq jedel meditsinalyq járdem jumysy men naýqastardy baǵyttaý jańa algoritmderge aýystyryldy.
Sonymen qatar, klinikalardyń materialdyq-tehnikalyq bazasy nyǵaityldy. Almaty qalasy Qoǵamdyq densaýlyq basqarmasy basshysynyń orynbasary Janar Madeevanyń aitýynsha, uiymdardy meditsinalyq jabdyqpen jabdyqtaýdy jańǵyrtý baǵdarlamasy aiasynda 74 statsionar men klinika úshin 4200-den astam jabdyq satyp alyndy. Sondai-aq, birinshi eshelondaǵy statsionarlardy meditsinalyq gazdardyń, onyń ishinde otteginiń ortalyqtandyrylǵan júiesimen qamtamasyz etý jónindegi jalpyqalalyq baǵdarlama iske asyrylýda. Qalanyń meditsinalyq uiymdaryndaǵy káriz sýlarynyń biologiialyq qaýipsizdigi rejimi engizildi. Meditsinalyq qaldyqtardy kádege jaratýdy baqylaý kúsheitildi.
Vitse-premerge jańa modýldik infektsiialyq statsionar 300 tósekke eseptelgendigi baiandaldy. Almaty qalasynyń infektsiialyq balalar aýrýhanasynyń bas dárigeri Erjan Seralin statsionarda barlyǵy 320 meditsina qyzmetkeri jumys isteitinin málim etti. 8 bólimshe, onyń ishinde bokstalǵan palatalary bar 2 blok qarastyrylǵan. Jansaqtaý bóliminde - 30 tósek, PTR-zerthanasy bar bólimshe, sondai-aq ár palatada ylǵaldandyrylǵan ottegi bar (16 tonna suiyq ottegi, 8 tonnadan quiylǵany tur). Jansaqtaý jáne qabyldaý bólimshesinde gazdyń 3 túri júrgizilgen.
Óz kezeginde «Respýblikalyq elektrondyq densaýlyq saqtaý ortalyǵy» ShJQ RMK Almaty qalalyq filialynyń direktory Gúlnar Ysqaqova jedel áreket etý jáne basqarý úshin qaladaǵy epidemiialyq jaǵdaiǵa onlain monitoring júrgizýge baǵyttalǵan tsifrlyq ákimshilendirýdiń jańa quraldaryn kórsetti.
Nysandy aralaý kezinde QR Premer-Ministriniń orynbasary Eraly Toǵjanov táýekel tobyndaǵy adamdarmen jumys jeke júrgizilýi tiis ekenin atap ótti. Olardy aýrýhanaǵa jatqyzý birinshi kezekte júzege asyrylýy tiis. Sonymen qatar, testileý jáne vaktsinatsiia máselelerine nazar aýdaryldy. Aýrýhananyń modýldik filialynyń aýmaǵynda zerthana bólimshesi bar, onda COVID-19-ǵa 2 myńǵa deiin PTR zertteý júzege asyrylady. Ony 5 myńǵa deiin ulǵaitý josparlanýda.
Eraly Toǵjanov jumys sapary aiasynda qazaqstandyq vaktsinanyń klinikalyq zertteýleriniń I kezeńi aiaqtalǵanyn atap ótti. Óz kezeginde, zertteýdiń II kezeńi boiynsha aralyq esepke sáikes vaktsina joǵary tiimdilikti kórsetken.
Qazirgi ýaqytta QR Bilim ministrliginiń Biologiialyq qaýipsizdik problemalarynyń ǵylymi-zertteý institýty QR Densaýlyq saqtaý ministrligimen birlesip zertteýdiń III kezeńi úshin daiyndyq jumystaryna kiristi.
