Qazgidromet mamandary qarashada respýblika boiynsha aýa raiy qandai bolatynyn aitty.
Konsýltativtik boljamǵa sáikes, ai bastala sala eldiń soltústigi men shyǵysynda kún sýytady.
"Birinshi onkúndiktiń basynda Qazaqstannyń soltústiginde, shyǵysynda jáne ortalyǵynda, 3 qarashadan bastap elimizdiń ońtústik óńirlerinde, onkúndiktiń sońynda respýblikanyń soltústik-batys jartysynda jańbyr men qar jaýady. Tuman, kóktaiǵaq bolyp, jel kúsheiedi", - dep habarlady mamandar.
3-4 qarashada respýblikanyń basym bóliginde batys aimaqtardan basqa jerlerde aiaz bolyp, qysqy aýa raiy ornaidy.
Qazaqstannyń batysynda túnde 0...+8°S-tan -5...+2°S-qa deiin, kúndiz +10...+18°S-tan 0...+10°S-qa deiin tómendeidi. Eldiń soltústik-batys jartysynda, ortalyǵynda jáne shyǵysynda túnde -5...+5°S-tan -5...-15°S-qa deiin, qiyr shyǵysta -20°S-qa deiin, kúndiz +2...+8°S-tan -3...-10°S-qa deiin tómendeidi.
Respýblikanyń ońtústiginde jáne ońtústik-shyǵysynda túnde -3...+5°S-tan -1...-13°S-qa deiin, kúndiz +10...+16°S-tan -5...+3°S-qa deiin tómendeýi múmkin.
Alaida qarashanyń ortasynan bastap temperatýra joǵarylaidy.
"Ekinshi onkúndiktiń birinshi jartysynda Qazaqstannyń basym bóliginde aýa raiy qubylmaly bolady. Ekpindi jel soǵyp, qar túrinde jaýyn-shashyn jaýady. Ekinshi onkúndiktiń sońynda, úshinshi onkúndiktiń basynda jáne sońynda temperatýra tómendeidi", - deidi sinoptikter.
Respýblikanyń soltústiginde, soltústik-batysynda, shyǵysynda jáne ortalyǵynda eń sýyq kúnderi synap baǵanasy túnde -17...-25°S-qa deiin, kúndiz -8...-13°S-qa deiin, al eldiń batysynda, ońtústiginde jáne ońtústik-shyǵysynda túnde -5...-17°S-qa deiin, kúndiz -2...-7°S-qa deiin túsýi múmkin.
Eldiń soltústiginde aiaz beti qaitqan kezde termometr baǵany oń mánge aýysady, al ońtústikte aýa temperatýrasy +3...+12°S-qa deiin joǵarylaidy.
