BUU Bas Assambleiasy balalardy soldat retinde jaldaý problemasymen kúresý úshin balalardyń qarýly qaqtyǵystarǵa qatysýyna bailanysty Bala quqyqtary týraly konventsiiaǵa qosymsha hattama qabyldady, dep habarlaidy "Ult aqparat" BUU saityna silteme jasap.
Qujat 2002 jyldyń 12 aqpanynda kúshine engen edi. Bul kún Halyqaralyq sarbaz-balalardy paidalanýǵa qarsy kúres kúni retinde atap ótiledi, sondai-aq Qyzyl qol kúni degen ataýmen tanymal.
Sońǵy jyldary balalarǵa qatysty jasalǵan óreskel zań buzýshylyqtar sany artyp keledi. Buǵan jaýap retinde BUU Bas hatshysynyń Balalar men qarýly qaqtyǵystar máseleleri jónindegi arnaiy ókili Virdjiniia Gamba qaqtyǵystarǵa qatysqan balalardy qorǵaý úshin AKT-ti iske qosty. Bul – soǵystan zardap shekken balalardy qorǵaý boiynsha is-qimyldardy arttyrý jáne aqparattar taratý jahandyq naýqany.
Aldaǵy úsh jyl ishinde naýqan qaqtyǵystar kezinde balalarǵa jasalatyn óreskel zań buzýshylyqtardy toqtatýǵa jáne boldyrmaýǵa baǵyttalǵan is-qimyldardy qoldaý maqsatynda Birikken Ulttar Uiymy, azamattyq qoǵam men halyqaralyq qoǵamdastyq arasyndaǵy yntymaqtastyqty nyǵaitýǵa baǵyttalatyn bolady.
BUU álem elderin AKT-ti kelesidei joldarmen qoldaý bildirýge shaqyrady:
- Qaqtyǵystar bolyp jatqan elderdegi balalardyń ómirinen habardar bolyńyz jáne ol týraly málimettermen bólisińiz;
- Janjaldasýshy taraptarǵa barlyq balalar qorǵalýy tiistigin bútin álem qoldaitynyn eske salyńyz;
- Óreskel zań buzýshylyqtardan zardap shekken balalarǵa qyzmet kórsetetin uiymdardy qoldańyz;
- Álem mádenietin ilgeriletý jáne balalar úshin qaýipsiz qoǵam qurýǵa kómektesetin bastamalardy qoldańyz;
- Halyqaralyq qoǵamdastyqty qoldaý, balalardy qorǵaityn resýrstarǵa kóńil bólý.
