BUU-nyń bosqyndar isi jónindegi agenttigi zorlyq-zombylyqtyń kúsheiýinen 2021 jyldyń aiaǵyna deiin Aýǵanstannan millionǵa jýyq adam qashýy múmkin dep topshylaidy. Agenttik ol bosqyndarǵa kómek kórsetýge qazirden daiarlanyp jatqanyn habarlady.
BUU Bosqyndar isi jónindegi joǵarǵy komissariaty basqarmasy (BUU BJKB) "Taliban" qozǵalysy bilikti basyp alǵannan keiin Aýǵanstanda "aýmaly-tókpeli jaǵdai qalyptasqanyn jáne ol tez ózgerip shyǵa kelýi múmkin" ekenin málimdedi.
Agenttiktiń habarlaýynsha, qazirdiń ózinde shetelde bosqyn retinde 2,2 mln aýǵan azamaty tirkelgen, olardyń barlyǵy derlik Pákistan men Iranda kún keship jatyr. Endi solardyń qataryna jańadan 500 myńdai bosqyn qosylmaqshy.
Bosqyndar isi jónindegi agenttiginiń boljamy boiynsha, biylǵy jyldyń ózinde Aýǵanstannyń ishindegi qaqtyǵystarǵa bailanysty 558 myń adam eldiń bir óńirinen ekinshisine qonys aýdarýǵa májbúr bolǵan. Olardyń barlyǵy derlik - áielder men balalar.
BUU BJKB jetekshisiniń orynbasary Kelli Klements Jenevada ótken brifingte, aimaqta 500 myńǵa jýyq jańa bosqyn paida bolýy múmkin degen joramaldaǵy adam sany "eń nashar stsenarii" aiasynda shamamen alynǵanyn aitty.
Kún saiyn Iran aýmaǵyna birneshe myń aýǵan azamaty enip jatqany tirkelip otyr, al saýdagerler Aýǵanstan men Pákistan arasynda bul eki elge kirip-shyǵyp júr deidi Klements. Qazirgi ýaqytta aýǵan azamattary elden tym kóp mólsherde ketip jatpasa da, "Aýǵanstandaǵy ahýal eshkim kútpegen óte jedel qarqynmen lezde ózgerdi" deidi BUU BJKB ókili.
