14 qyrkúiekte Kókshetaý qalasynda «Qazaqstan A la Prima» forýmdar seriiasy sheńberinde «Býrabai ańyzdary» halyqaralyq sýretshiler forýmy qorytyndylandy. «Kókshetaý» mádeniet saraiynda Aqmola oblysynyń álemdik sýretshileri syilaǵan 40 sýrettiń kórmesi uiymdastyryldy.
Art-forým Dinara Nuger, Jubaniiazov Ómirbek, Elena Iokton, Baqytnur Býrdesbekov, Baqytjan Dosimov (Qazaqstan), Erkin Djýraev (Ózbekstan), Ilnýr Siraziev, Viktoriia Mavrina (Tatarstan), Sharshekeev Almaz (Qyrǵyzstan), Geimran Baimuhanov (Resei), Robert Hettih, Olga Miýller (Germaniia), Elena Rýzgýs, Emine Tokmakkaia (Túrkiia), Lethan Týng, ta Dýi (Vetnam), Djakka Djang (Koreia), Alan Skalaski, Aisulý Qadyrhanova (AQSh), Ram Viranjan (Úndistan) sekildi álemdik 20 belgili sýretshiniń basyn qosqan.
Budan buryn, qyrkúiektiń 3-nen 13-ne deiin qylqalam sheberleri úshin stýdiialyq jumystar, plener, Býrabaidyń kieli jáne tarihi jerlerine týristik joryqtar uiymdastyryldy.
«Biz úshin Býrabai - erekshe qasietti oryn. Bul jerde tabiǵatty qalai jaqsy kóretininińdi túsinesiń. Forým sýretshilerdiń jumystary arqyly búkil álemmen osy ólkeniń sulýlyǵymen bólisýge biregei múmkindik berdi!», - deidi "A la Prima" direktory Áigerim Seikenova.
Aqmola oblysynyń Mádeniet, muraǵattar jáne qujattama basqarmasynyń habarlaýynsha, qylqalam sheberleri, ártúrli mektepter men baǵyttardyń muragerleri, birtutas shyǵarmashylyq protseste biriktirilgen, sýretterde Býrabaidyń taýlaryn jáne kólderin beineleitin bolady. Sonymen qatar, forýmǵa qatysýshylar bizdiń ata-babalarymyz ben batyrlarymyzdyń jolymen júrip, tarihty zertteýge, kieli de qasietti oryndarǵa baryp, beineleý óneri arqyly mádeniettiń bailyǵyn álemge jetkizýge múmkindikteri bolady. Tabiǵattyń áseri men jańa tájiribeler shyǵarmashylyqqa kúshti serpin bola alady. Dál osyndai jobalar qundy týyndylar jasaýǵa shabyt beredi. Bul - Býrabaidaǵy halyqaralyq sýretshiler forýmy qatysýshylaryna úlken múmkindik pen shyǵarmashylyq izdenis.
14 qyrkúiekte kórmege kele almaǵan adamdar oblystyq ádebiet jáne óner murajaiynda sýretshilerdiń jumystarymen tanysa alady.
