18 tamyz – el irgesin kúzetken Shekarashylar kúni, dep habarlaidy "Ult aqparat".
1992 jyldyń 18 tamyzynda «Shekara áskerlerin qurý týraly» Prezident Jarlyǵyna qol qoiyldy. Alaida aitýly data Qazaqstannyń memlekettik merekeler kúntizbesine 2012 jylǵy 29 tamyzda ǵana engizildi.
Shekarashylar memlekettik shekarany qorǵap, kúzetedi. Shekarada bolǵan kez kelgen kúmándi oqiǵany qalt jibermei, shekara rejimin baqylaidy. Olardyń mindetterine adamdardy memlekettik shekara arqyly ótkizý, ótkizý beketterindegi tártipti baqylaý, shekara shebindegi mekemelerdi qorǵaý, memlekettik shekara rejimin qamtamasyz etý siiaqty ister kiredi.
«Shekara qaýipsizdigi – Qazaqstan Respýblikasynyń ulttyq qaýipsizdiginiń ajyramas bóligi. Ony eldiń saiasi jáne ekonomikalyq múddelerin muqiiat qorǵaityn Ulttyq qaýipsizdik komitetiniń quramdas bóligi – Shekara qyzmeti iske asyrady. Búgingi shekarashylar transshekaralyq qylmysqa, halyqaralyq terrorizm men ekstremizmge, zańsyz kóshi-qonǵa, eldiń aýmaqtyq tutastyǵy men egemendigin buzýǵa senimdi tosqaýyl qoia otyryp, batyr babalardyń jaýyngerlik dástúrin abyroimen jalǵap keledi», - dep jazylǵan UQK Shekara qyzmetiniń habarlamasynda.
Memlekettik shekarany qorǵaý sharalary Qazaqstan Respýblikasynyń Úkimeti men ýákiletti organdardyń óz quzyreti sheginde qabyldaǵan saiasi, quqyqtyq, uiymdastyrýshylyq, ekonomikalyq, shekaralyq, áskeri jáne ózge de sheshimderi aiasynda iske asyrylady.
Eldiń shetinde, jeldiń ótinde júrgen sarbazdardyń qyraǵy bolyp, jaýapty qyzmet atqarýy búkil eldegi tynyshtyqtyń kepili bolyp otyr.
