Batys Angliia ýniversitetiniń biznes jáne quqyq fakýlteti quqyq kafedrasynyń aǵa oqytýshysy, Kriminologiia jáne quqyq baǵdarlamalarynyń jetekshisi, qylmystyq sot tóreligin zertteý bóliminiń menedjeri Edvard Djonston Eýropada pandemiia kezeńinde sot organdary qalai jumys istep jatqany týraly aitty, dep habarlaidy QazAqparat.
Ǵalym bul málimetterdi Eýropadaǵy qaýipsizdik jáne yntymaqtastyq uiymynyń Nur-Sultandaǵy baǵdarlamalar keńsesi men QR Joǵarǵy soty jáne Quqyqtyq saiasatty zertteý ortalyǵy «COVID-19 pandemiiasy kezinde sot tóreligine qol jetkizý» taqyrybyndaǵy onlain kezdesýde aitty.
Edvard Djonston Angliia men Ýelste, sondai-aq AQSh-ta pandemiianyń qylmystyq protseske janama áser etkenine toqtaldy.
«Olardyń ishinde kináni moiyndaý týraly mámileler men advokat kómegin paidalaný quqyǵynan bas tartý sharalary kóbeiip, alqabiler qaraǵan ister sanynyń azaiǵanyn baiqaýǵa bolady. Sot protsesiniń qysqartylǵan túrleri, sottalýshyny sotqa deiingi ustaý kezinde kináni moiyndaýǵa májbúrleý beleń aldy. Sotqa deiingi protsester táýekeli joǵary «poker» oinyna ainalǵandai bolyp otyr. Aiybyn moiyndap mámilege kelse, jaza merzimi qysqartylady. Al kelispese, 25 jylǵa deiin bas bostandyǵynan aiyrý qaýpi týyndady. Prokýrordyń aiyptaýdaǵy ókileti sheksiz sipat aldy. Al advokattardyń sot júktemesi aýyrlady», - degen sarapshy pandemiia jaǵdaiyndaǵy sot júiesinde advokattardyń róli álsiregenin problema etip kóterdi.
«Onlain otyrystardyń áserinen qarsylasý printsipi kúshin joia bastady. Al qylmystyq sot tóreligine basqarýshylyq-ratsionalizatorlyq tásil engizý advokattyń qorǵaýdaǵy rólin ekinshi orynǵa yǵystyrdy. Munyń astarynda kinási joq kúdiktiler qysym saldarynan jasamaǵan qylmysty moiyndaý qaýpi kóbeiedi. Bizge pandemiia kezindegi saqtyq amaldaryn indete engizýdi tejep, quqyqtyq protsedýralarda zańǵa quqyqtyq printsipterdi negizge alý qaǵidatyn ustaný kerek», - dedi Edvard Djonston.
