«Bozjyra» shatqalynda qurylys jumystary bastalady, dep habarlaidy QazAqparat tilshisi. Bul týraly Ortalyq kommýnikatsiialar qyzmetinde ótken brifingide Mańǵystaý oblysynyń ákimi Serikbai Ótelgenuly málim etti.
«Barshańyzǵa belgili Mańǵystaý – bul týrizmdi damytýdyń biregei áleýeti bar, kieli jáne qasietti oryndar, tabiǵi jaýharlar, biregei turmys jáne ǵasyrlyq dástúrler bar ólke. Sondyqtan, eko, etnotýrizmdi damytýdy dáripteý maqsatynda Mádeniet jáne sport ministrligimen jáne «Kazakh Tourism «UK» AQ-men birlesip týristik baǵyttar aiqyndalǵan bolatyn», - dedi ol.
Onyń ishinde «Bozjyra» baǵyty belsendi damýda. Osy baǵytty damytý maqsatynda investor «TETHYS AKTAU IV» kompaniiasy usynǵan jobalardyń biri Qaraqiia aýdanyndaǵy Etnoaýyl jobasy bolyp otyr.
«Bastapqyda investor Bozjyra shatqalyndaǵy Jabaiushqan qoryqshasynyń aýmaǵynda jobany iske asyrýdy usynǵan bolatyn.
Alaida, jobany júzege asyrý orny azamattyq qoǵamnyń jaǵymsyz reaktsiiasyna sáikes jáne osyǵan bailanysty, Memleket basshysynyń tapsyrmasyna orai qaita qaraldy», - dedi ol.
Nátijesinde Mańǵystaý oblysy ákimdigi Mádeniet jáne sport, Ekologiia, geologiia jáne tabiǵi resýrstar ministrlikterimen birlesip, qoǵam ókilderimen, ardagerlermen, ekoqorǵaýshylarmen, ǵalymdarmen, Ekologiia, Biologiia salasyndaǵy sarapshylarmen birqatar keńester men kezdesýler ótkizip, jobanyń iske asyrý ornyn Bozjyranyń «Azý» aimaǵynan 4 km qashyqtyqta qaýmaldan tys jerden belgiledi.
«Sondai-aq, investor infraqurylymdy júrgizý bóliginde «Jasyl» tehnologiialardy qoldanatyn bolady. Al, oblys ákimdigi tarapynan Bozjyra shatqalyna jáne qaraý alańdaryna deiin avtomobil joldarynyń qurylysy qamtamasyz etiletin bolady», - dedi ol.
Búgingi kúni investor topyraqtyń geologiialyq jaǵdailaryn anyqtaý úshin injenerlik-geologiialyq izdestirý jumystaryn júrgizdi jáne qoldanystaǵy greider joly qalpyna keltirý boiynsha jobalyq-smetalyq qujattama ázirlenýde.
Sonymen birge, joǵaryda atalǵan joba boiynsha «Qazaqstan Ekoforým» Qaýymdastyǵynan qoǵamdyq ekologiialyq saraptama alý kútilýde, onyń sheńberinde usynymdar investorǵa jiberiletin bolady.
