Nur-Sultan qalasyndaǵy Qarýly Kúshterdiń Áskeri-tarihi mýzeiinde Bógenbai batyrdyń dýlyǵasyn saltanatty túrde murajai qoryna tapsyrý rásimi ótti, dep habarlaidy QazAqparat Qorǵanys ministrliginiń baspasóz qyzmetine silteme jasap.
Dýylǵany Aqmola oblysy, Ereimentaý aýdany Maltabar aýylynyń turǵyny, aty ańyzǵa ainalǵan batyrdyń jetinshi urpaǵy Jabai Kenjalin saqtaǵan.
Áskeri-tarihi mýzei qyzmetkerleri jańa eksponatty erekshe tarihi qundy jádiger ekenin tilge tiek etti.
Qanjyǵaly Bógenbai batyr (1680-1778) – úsh júzdiń áskerin basqarǵan qazaqtyń uly qolbasshysy. Aqtyq demi qalǵansha qazaq eliniń táýelsizdigi jolynda kúresip, jońǵar shapqynshylyǵy kezinde erlik kórsetken.
Úsh ǵasyr ótse de batyrdyń jeke qarýynyń keibirin balalary kózdiń qarashyǵyndai saqtap, urpaqtan-urpaqqa jetkizdi.
Shara Qazaqstan Táýelsizdiginiń 30 jyldyǵyna orailastyrylyp, qazaq halqynyń ásker tarihyna qyzyǵýshylyqty arttyrýǵa, murajai isin dáripteýge baǵyttaldy.
Saltanatty rásimge «Qarýly Kúshterdiń ardagerleri» respýblikalyq qoǵamdyq birlestigi tóraǵasynyń orynbasary otstavkadaǵy general-maior Marat Naǵumanov qatysty.
