Foto: egemen.kz
Qazaqstanda blogerlerge qatysty salyqtyq tekserýler kúsheiip jatyr. Bul týraly qarjy vitse-ministri Erjan Birjanov málimdedi, dep habarlaidy Ult.kz.
Onyń aitýynsha, tekserýler bastalǵaly beri salyq organdary 854 blogerge tabysty tómendetip kórsetý faktileri boiynsha 72 milliard teńgege qatysty 1 586 habarlama joldaǵan.
Qazirgi tańda olardyń 622-si qosymsha salyq deklaratsiiasyn tapsyryp, tabystaryn 18,3 milliard teńgege arttyrǵan. Nátijesinde biýdjetke qosymsha 1 milliard teńgege jýyq salyq tólengen. Sonymen qatar, taǵy shamamen 600 million teńge tóleý mindettelgen.
Vitse-ministrdiń sózinshe, qazirgi ýaqytta 7 blogerge qatysty tekserý jalǵasyp jatyr. Olarǵa qosymsha eseptelgen salyq kólemi 10 million teńgeden asady.
«Eger tekserý nátijesinde anyqtalǵan somalar erikti túrde tólenbese jáne kólemi aitarlyqtai bolsa, materialdar quqyq qorǵaý organdaryna joldanady», – dedi Birjanov Úkimettegi brifingte.
Sheneýnik salyq qupiiasyna bailanysty naqty esimderdi ataýdan bas tartty.
Aita keteiik, 2024 jyldyń aqpanynda da qazaqstandyq blogerlerge jappai salyqtyq habarlamalar jiberilgen bolatyn. Sol kezde 594 adam tabysyn 53,3 milliard teńgege tómendetip kórsetkeni anyqtalǵan.
