Foto: QR TJM
TJM resmi ókili Rýslan Imanqulov Batys Qazaqstan oblysyndaǵy tikushaq apatynan keiin nege alǵashynda bári aman qalǵany málimdelgenin aitty, - dep habarlaidy Tengrinews.kz saity.
Onyń aitýynsha, oqiǵa ornynda bailanys nashar bolǵan jáne internet bolmaǵan.
"Dispetcher tiri qalǵan qyzmetkerimizge qońyraý shala almady, oqiǵa ornynda bailanys óte nashar boldy, internet joq edi, telefon bailanysy da nashar boldy. Sondyqtan dispetcherler qońyraý shalǵan kezde aman qalǵan qyzmetkerimiz "tirimin" ne "tirimiz" dep, telefon bailanysy úzilip qalǵan", - dep túsindirdi ol brifing barysynda.
Imanqulovtyń sózinshe, barlyq derek naqtylanǵan kezde ǵana qyzmetkerler qaza tapqany rastalǵan.
"Qyzmetkerlerimiz igi ispen ainalysty, adamdardy qutqarýǵa jáne denelerdi shyǵaryp alýǵa qatysty. Dál sol kezde qyzmetkerlerimiz osyndai oqiǵa bolýy múmkin ekenine daiyn emes edi", - dep jaýap berdi ol.
Eske salaiyq, 23 aqpanda saǵat 15:50-de Batys Qazaqstan oblysy Báiterek aýdany Chapýrino eldimekeninen 6 shaqyrym jerde "Qazaviaqutqarý" AQ-tyń 2021 jyly shyǵarylǵan Mi-8 AMT tikushaǵy jerge qatty ekpinmen qonǵan. Bortta 6 adam - 5 ekipaj múshesi jáne «QazTransOil» AQ-nyń 1 ókili bolǵan. Oqiǵa saldarynan 4 adam qaza taýyp, 2 adam zardap shekti.
MI-8 AMT Atyraý - Oral - Atyraý baǵytymen "Qaztransoil" AQ tapsyrysy boiynsha munai qubyryn teksergen.
