Batys Qazaqstan oblysynda jol apatynan tiri qalǵan naýqasqa 10 saǵat ota jasaldy, dep habarlaidy "Ult aqparat".
QazAqparat budan buryn jazǵanyndai, Batys Qazaqstan oblysynda jol apatynan alty adam qaza tapqan bolatyn.
Sonymen qatar Atyraý oblysynyń 42 jastaǵy turǵyny túrli jaraqatpen Aqjaiyq aýdany Taipaq aýyldyq aýrýhanasyna jetkizilgen edi.
Oblystyq densaýlyq saqtaý basqarmasynyń baspasóz qyzmeti málim etkenindei, aýyldyq aýrýhana dárigerleri alǵashqy tekserý kezinde ishtiń jabyq jaraqatyn baiqady. Oǵan meditsinalyq járdem kórsetilip, em-dom qoldanyldy. Alaida 22 aqpan kúni saǵat 22.00-ge qarai naýqastyń jaǵdaiy nasharlai bastady. Sol sebepti Chapaev aýylyndaǵy aýdandyq aýrýhananyń hirýrgter toby shaqyryldy. Aýrýhana direktory, joǵary sanatty hirýrg Almas Júnisbekov pen hirýrg Dáýren Qudesov ish qýysyna ota jasady. Áitse de áriptesterdiń járdemi qajet boldy. Kún boran edi, sondyqtan Oraldan mamandardy shaqyrý múmkin bolmady.
Kómekke Jańaqala aýdandyq aýrýhanasynyń bas dárigeri, ota jasaýda 14 jyl jáne meditsinalyq aviatsiiada tájiribesi bar, joǵary sanatty hirýrg Serjan Esengóbekov shaqyryldy. Chapaevtan ári qarai boranǵa bailanysty tas jol jabyq bolǵandyqtan, dárigerdiń maqsatyn bilgennen keiin ony patrýldik politsiia batalonynyń eki qyzmetkeri kólikterimen Taipaqqa jetkizdi.
Osyndai birlesken is-qimyl nátijesinde naýqasqa 10 saǵattan astam ýaqyt boiy ota jasaldy.
«Qazir er adamnyń jaǵdaiy aýyr, ony tasymaldaý múmkin emes, degenmen jaraqat saldaryn jeńip, ómir súredi degen úmit bar», dep habarlady oblystyq densaýlyq saqtaý basqarmasynyń baspasóz qyzmeti.
