Batys Qazaqstan oblysynda sońǵy tórt kúnde 732 adamnan koronavirýs anyqtaldy, dep habarlaidy "Ult aqparat".
BQO sanitarlyq-epidemiologiialyq baqylaý departamenti málim etkenindei, sonyń 531-inde aýrý belgileri bolsa, 201-i – simptomy joqtar.
Indet juqtyrǵandardyń 471-i JRVI belgileri boiynsha tekserilgen, 106-sy buryn aýyrǵandarmen qarym-qatynasta bolǵan. 107-sinen profilaktikalyq maqsatta, 6 adamnan statsionarǵa jatqyzar aldynda synama alynǵan.
Tórt kúnde anyqtalǵandardyń 328-i Oral qalasy, 123-i Báiterek, 101-i Bórli, 34-i Terekti, 27-si Aqjaiyq aýdanynyń úlesine tiedi.
Pandemiia bastalǵannan beri óńirde barlyǵy 26188 naýqas tirkelip, sonyń 20735-i jazylyp shyqty. 418-i koronavirýstan kóz jumdy.
Barlyq aýyrǵandardyń 14312-si Oralda, 3295-i Báiterek, 2984-i Bórli, 1078-i Terekti aýdanynda tirkelgen.
Epidemiolog mamandardyń paiymdaýynsha, indet kózi qoǵamdyq kólikterde, adamdar jii jinalatyn jerlerde (saýda úileri, meditsina uiymdary, qoǵamdyq tamaqtandyrý oryndary) kóbirek taralady. Sondai-aq buryn aýyrǵandarmen qarym-qatynas kezinde, eske alý, toi-tomalaqqa barǵanda, karantindik talaptar saqtalmasa, jumysta da juqtyrýy yqtimal. Sondyqtan turǵyndardyń saqtyq sharalaryn umytpaǵany abzal.
