Batys Qazaqstan oblysynda politsiia qyzmetkerleri kelinshekti avtokólikte bosandyryp aldy, dep habarlaidy "Ult aqparat".
BQO politsiia departamentiniń resmi ókili Bolatbek Belgibekovtiń málim etkenindei, oqiǵa 26 aqpanǵa qaraǵan túni Samara-Shymkent avtojoly boiynda Syrym aýdany Alǵabas aýyly tusynda boldy.
«VAZ-2110» avtokóligi synyp, jolda turyp qalǵan. Onyń júrgizýshisi avtokólikte júkti kelinshektiń tolǵaǵy bastalǵanyn jetkizgen. Politsiia leitenanty Ernis Baqtygereev pen politsiia aǵa leitenanty Timýr Súiináliev áieldi patrýldik avtokólikke otyrǵyzyp, jedel járdem shaqyryp, Oralǵa bet alǵan. Jolshybai Toǵanas aýyly mańynda kelinshek aman-esen bosanyp, tártip saqshylary shaqalaqtyń kindigin kesken. Terekti aýdany Podstepnyi aýylyna jetkennen keiin áiel sábiimen jedel járdem dárigerlerine berildi.
Taǵy bir osyndai oqiǵa keshe Bórli aýdanynda boldy. Aqsai qalasynda turatyn kelinshek tolǵaǵy bastalǵannan keiin taksi shaqyrǵan. Taksi júrgizýshisi tájiribesi az bolǵandyqtan, áieldi barynsha tez jetkizý kerektigin jolshybai kezdesken patrýldik politsiia qyzmetkerlerine aitqan. Politsiia kapitany Nursultan Bekesov pen aǵa leitenant Erlan Órisbaev áieldi óz kólikterine otyrǵyzyp, Bórli aýdandyq aýrýhanasyna dereý jetkizdi. Ile-shala shaqalaqtyń daýsy estildi.
Sábilerdiń ata-analary politsiia qyzmetkerlerine alǵysyn bildirdi.
