Foto: ashyq derekkóz
Qarjylyq monitoring agenttiginiń Batys Qazaqstan oblysy boiynsha departamenti azamattardyń bank shottaryna zańsyz qol jetkizip, alaiaqtyq jolmen alynǵan qarajatty ainalymǵa shyǵarýmen ainalysqan toptyń áreketin toqtatty, dep habarlaidy Ult.kz.
Tergeý málimetinshe, kúdikti Veidner T.E. qylmystyq shemany uiymdastyryp, zańsyz tabysty úshinshi tulǵalardyń shottary arqyly ótkizip, keiin qolma-qol aqshaǵa ainaldyrýdy úilestirgen. Ol «dropperlerdi» tartyp, árqaisysyna naqty mindetter bólip bergen. Mundai qyzmet úshin qatysýshylarǵa 200-den 350 AQSh dollaryna deiin syiaqy tólenip otyrǵan.
Máselen, 2025 jylǵy qazanda Oral qalasynda stýdentterdiń biriniń atyna bank shottary ashylyp, onlain-bankingke qol jetkizý derekteri uiymdastyrýshyǵa berilgen. Osy shottar arqyly internet-alaiaqtyqtan túsken qarajat ótkizilip, keiin aiyrbastalyp, shetelge aýdarylǵan.
Keiin shot iesi árekettiń zańsyz ekenin túsinip, quqyq qorǵaý organdaryna óz erkimen júgingen. Sonyń arqasynda qarjy operatsiialaryn der kezinde toqtatyp, shottardy buǵattaýǵa múmkindik týǵan. Alaida kúdiktiler jábirlenýshige qysym kórsetip, bank qosymshalaryn qaita verifikatsiialaýdy talap etken.
Sonymen qatar, ony páterde zańsyz ustap, kúsh qoldanamyz dep qorqytyp, uialy telefonyn lombardqa tapsyrýǵa májbúrlegen. Túsken qarajatty ózara bólisken. Budan bólek, kúdiktiler shottardaǵy shekteýlerdi alyp tastaýǵa áreket jasap, jábirlenýshini bankter men ákimshilik organdarǵa ertip júrgen.
Qazirgi ýaqytta shema uiymdastyrýshysy qamaýǵa alyndy. Al onyń alty sybailasyna qatysty kepil jáne elden shyqpaý túrindegi bultartpaý sharalary qoldanyldy. Qylmystyq is sotqa joldandy.
