Foto: QR TJM
Batys Qazaqstanda apatqa ushyraǵan tikushaqtyń tehnikalyq aqaýy bolǵan joq. Bul týraly Tótenshe jaǵdailar ministri Iýrii Ilin málimdedi, dep habarlaidy Sputnik Qazaqstan portaly.
Onyń aitýynsha, qazir komissiia jumysyn jalǵastyrýda.
"Aldyn ala málimet boiynsha tikushaqtyń tehnikalyq aqaýy bolmaǵan, ekipaj – kásibi. Ushqyshtyń ushý ýaqyty 2 600 saǵattan asady, ekinshi ushqyshta – 4 myń saǵatqa jýyq. Sondyqtan olardyń kásibi deńgeiine esh kúmándanýǵa bolmaidy", - dedi Ilin Úkimet kýlýarynda.
Ministr tikushaqtyń neden qulaǵany komissiianyń qorytyndysynan keiin ǵana belgili bolatynyn aitty.
Indýstriia jáne infraqurylymdyq damý ministri Marat Qarabaevtyń aitýynsha, kez kelgen tekseris úsh aidan alty aiǵa deiin sozylady.
"Eki baǵytta jumys istep jatyr. Birinshisi – adamdardyń qaza tabýyna bailanysty Ishki ister ministrligi óz tarapynan qylmystyq is qozǵady. Al bizdiń ministrlik tarapynan sonyń sebebin anyqtaý boiynsha tiisti komissiia jumys istep jatyr", - dedi ol Úkimette jýrnalisterdiń suraǵyna jaýap berip.
Eske salsaq, qaiǵyly oqiǵa 23 aqpan túste boldy. Batys Qazaqstan oblysynda "Qazaviaqutqarýdyń" Mi-8 AMT tikushaǵy apatty jaǵdaida qondy. Saldarynan ekipajdyń tórt múshesi qaza tapty. Taǵy eki adam – Qazaviaqutqarý injeneri men "QazTransOil" AQ jelilik qubyrjolshysy aýrýhanaǵa tústi. Tergeý bastaldy.
Sonymen qatar tikushaq apatynan keiin Qazaqstanda Mi-8 tipti áýe kemelerin paidalanatyn barlyq áýe kompaniiasy tekseriledi.
