Qazaqstandyq tanymal prodiýser, rejisser Nurtas Adambai qiyn-qystaý zamanda iri biznes ókilderi halyq problemasynan alshaqtamaǵany jón degen pikir bildirdi, dep habarlaidy "Ult aqparat".
«Memleket ázirge sheshim qabyldap, qarapaiym halyq aýrýmen, ómirmen kúresip jatqanda milliardtaǵan aqshasy bar biznesmender, onyń ishinde «Forbs»-qa kiretin aýqatty jandar jaǵdaidy syrttan baqylap otyrmaýy tiis. Olar osy qazaq jeri men eliniń arqasynda óz milliardtaryn taýyp, jetistikke jetti. Dál osy sát - bai-qýatty jandardyń adamgershiligi men meiirimin kórsetýge jaqsy múmkindik. Múmkin men qarabaiyr dúnieni aityp turǵan shyǵarmyn, degenmen olar milliardtaǵan aqshalaryn ómir boiy jumsap bitire almaityny belgili. Osyndai qiyn sátte nege qolushyn sozbasqa? Biznes halyqtyń problemasynan alshaqtamaýy tiis. Aitpaǵym, iri biznestiń ókilderi azamattarǵa qolǵabys tigizse eken deimin. Bárin aitpaǵannyń ózinde bir ǵana bai adam jaǵdaiymen búkil máseleni sheshe alar edi», - dedi Nurtas Adambai QR Sybailas jemqorlyqqa qarsy qyzmetiniń uiymdastyrýymen ótken onlain máslihatynda.
Belgili óner juldyzynyń aitýynsha, jeke áleýmettik paraqshasyndaǵy biznestiń jaýapkershiligi týraly jazbasynan keiin, oǵan nietti adamdar qolushyn sozý maqsatynda habarlasqan.
«Maǵan jeke áleýmettik paraqsham arqyly nemese jazbalarymnyń astyna pikir retinde kóptegen azamattar kómek surap jazady. Bireýi dári-dármek surasa, ekinshisi azyq-túliktiń joqtyǵyn aitady. Osy oraida jaqyn tanys, joldastarymmen birlesip muqtaj jandarǵa meditsinalyq quraldar men qajettilikterdi satyp alyp berý josparymyzda bar. Qazirgi tańda sony uiymdastyrý jumystarymen ainalysýdamyz», - deidi ol.
