«Jas Otan» jastar qanatynyń belsendileri Nur-Sultan qalasy ákimdigimen jáne volonterlermen birlesip, karantin kezinde muqtaj otbasylarǵa áleýmettik mańyz bar azyq-túlikpen gigienalyq paketter taratýda, dep habarlaidy QazAqparat.
«Elbasy, «Nur Otan» partiiasynyń tóraǵasy Nursultan Nazarbaev «Biz birgemiz» aktsiiasyn jariialaǵanyn bilesizder. «Nur Otan» partiiasynyń aktsiiasy aiasynda qarajat bólindi jáne biz ómirlik qiyn jaǵdaiǵa tap bolǵan az qamtylǵan, kópbalaly otbasylarǵa, qart adamdarǵa kómektesemiz. Nur-Sultan qalasynda - 5 myń, Almatyda - 7 myńnan astam otbasyn qamtimyz. Áleýmettik paket ázirleimiz. Sonymen qatar gigienalyq paketter de taratamyz. Oǵan maska, antiseptik, dymqyl jáne qurǵaq mailyq, kir sabyn jáne iis sabyn kiredi. Aktsiiaǵa volonterler jumyldyrylǵan. Olar bizge kómektesip jatyr», - dedi «Jas Otan» jastar qanatynyń atqarýshy hatshysy Janat Shúkeev.
Onyń naqtylaýynsha, áleýmettik kómek kórsetiletin azamattardyń tizimi ákimdikten alynady. Sodan keiin jastar uiymdarynyń músheleri men eriktiler azyq-túlik pen gigienalyq jiyntyqty muqtaj otbasylarǵa taratady.
«Nur-Sultan qalasynda jalpy 400 erikti jumyldyrylyp otyr. Bul aktsiia 19 naýryz kúni bastaldy. Osy kúnderdiń ishinde 1 300 otbasyn qamtydyq. Josparymyzda elorda boiynsha 5 myńnan astam otbasyn qamtý bar. Búgin 500 otbasyǵa kómek taratýdy josparlap otyrmyz», - dedi ol.
Aktsiia sáýir aiyna deiin jalǵaspaq.
«19 naýryzdan «Magnum» saýda úiinen qoima aldyq jáne osy jerde azyq-túlik pen sharýashylyq taýarlaryn jinaqtaimyz. Qoldaýdy qajet etetin jalǵyz basty qarttar, kóp balaly otbasylar bar. Biz kún saiyn shamamen 500 qorap jinaqtap, muqtaj otbasylarǵa taratamyz. Mundai jiyntyqty elordanyń 4 aýdanynda taratamyz. Ár aýdanda 125 otbasydan bar», - dedi «Jas Otan» jastar qanaty elorda filialynyń tóraǵasy Baqdáýlet Jandildaev.
