Sinoptikter sáýirden bastap qazan aiyna deiingi aýa raiy boljamyn jariia etti, dep habarlaidy "Ult aqparat" Qazgidrometke silteme jasap.
Respýblikanyń basym bóliginde kóktem jyly jáne jaýyn-shashyndy bolady dep boljanýda.
Sáýir aiynda aýa temperatýrasy respýblikanyń shyǵys bóliginde normadan 1°S joǵary, batys bóliginde norma shamasynda bolady dep kútilýde. Mamyr aiynda, kerisinshe, aýa temperatýrasy elimizdiń ońtústik-batys bóliginde normadan 1°S joǵary, soltústik - shyǵys bóliginde norma shamasynda, Pavlodar oblysynyń shyǵysynda jáne Shyǵys Qazaqstan oblysynyń soltústiginde normadan 1°S tómen bolady dep boljanýda.
Jazdyń bastalýy Qazaqstannyń batysy men shyǵysynda norma sheginde boljanyp otyr, qalǵan aýmaqta aýa temperatýrasy klimattyq normadan 1°S-qa joǵary kúnder basym bolady. Maýsym aiynda Qazaqstannyń soltústik-shyǵys bóliginde jaýyn-shashyn jáne ońtústik-shyǵystyń kei jerlerinde norma sheginde kútiledi, qalǵan aýmaqta jaýyn-shashyn mólsheri – normadan tómen.
Jazdyń basym bóligi ystyq jáne jańbyrly bolmaidy dep kútiledi, alaida keibir kúnderi kún jylýymen qýantady. Osylaisha, shildede aýa temperatýrasy eldiń barlyq aýmaǵy boiynsha norma shamasynda, tamyzda tek batysta jáne soltústik-batysta kei jerlerde temperatýra normadan 1°S joǵary, qalǵan aýmaqta norma shamasynda bolady dep kútilýde.
2020 jyldyń kúzi elimizdiń basym bóliginde jyly bolady dep boljanýda, qyrkúiek aiynda Qazaqstannyń basym bóliginde jaýyn-shashyn normadan tómen bolady, elimizdiń soltústiginde, batysynda, shyǵysynda jáne ońtústik-shyǵysynda kei jerlerde norma sheginde bolady, qazan aiynda – QR soltústik-batys bóliginde jaýyn-shashyn normadan joǵary, ońtústik-shyǵys bóliginde – norma shamasynda, respýblikanyń soltústik, ortalyq, ońtústik-batys óńirleriniń basym bóliginde, ońtústik jáne soltústik-batysynda kei jerlerde normadan tómen bolady dep boljanýda.
Sinoptikterdiń málimdeýinshe, maýsymdyq boljam aýa temperatýrasy men jaýyn-shashynnyń klimattyq normadan aýytqýyn bildiredi, iaǵni bir ai normaǵa qatysty jyly nemese sýyq, jańbyrly nemese qurǵaq bolady. Maýsymdyq boljamdardyń ortasha aqtalýy 60-65%-dy quraidy, sebebi boljamnyń qateligi ol ázirlenetin merzimmen birge ósedi. Sondyqtan maýsymdyq boljamdy konsýltativti retinde paidalaný kerek, ol keiinnen bir aiǵa, onkúndikke, aptaǵa arnalǵan aýa raiy boljamdarymen naqtylanady.
