2020 jylǵy qańtar-maýsym aralyǵynda jalpy somasy 113,6 mlrd teńgege 389,1 myń otbasy kópbalaly otbasylarǵa arnalǵan memlekettik járdemaqymen qamtyldy. Maýsym aiynda osy járdemaqy túrin - jalpy somasy 19,7 mlrd teńgeni 398,091 myń otbasy aldy, dep habarlaidy "Ult aqparat".
Eńbek jáne halyqty áleýmettik qorǵaý ministrliginiń málimetinshe, atalǵan memlekettik járdemaqyǵa 4 jáne odan kóp birge turatyn kámeletke tolmaǵan nemese kúndizgi bólimde oqityn 23 jasqa deiingi stýdent balalary bar otbasylar tabysyna qaramastan úmitker bola alady. Tólem mólsheri balalardyń sanyna bailanysty 42,5 myń teńgeden (4 bala) 74,4 myń teńgege (7 jáne odan da kóp bala) deiin, 8 jáne odan keiingi ár balaǵa 4 AEK-ten saralanǵan.
Osylaisha, osy járdemaqynyń ulǵaiýy 8 jáne odan da kóp balasy bar otbasylar úshin jeke mólsherdi belgileý arqyly qamtamasyz etildi. Tiisti zańǵa Memleket basshysy biylǵy 13 mamyrda qol qoidy.
8 balasy bar otbasy úshin járdemaqy 88 896 teńgeni quraidy, 9 balaǵa – 100 008 teńge, 10 – 111 120 teńge, 11 - 122 232 teńge, 12 – 133 344 teńge, 13 – 144 456 teńge, 14 – 155 568 teńge, 15 - 166 680 teńge, 16 – 177 792 teńge tólenedi.
Zań 2020 jyldyń 1 qańtarynan bastap kúshine endi, osyǵan bailanysty 8 jáne odan kóp balasy bar kópbalaly otbasylarǵa beriletin járdemaqy mólsheri taǵaiyndalǵan kezden bastap qaita esepteldi. Osylaisha, tólenbegen soma osy jyldyń shilde aiynda aýdaryldy.
Jalpy, 2020 jyly kópbalaly otbasylarǵa memlekettik járdemaqy tóleýge respýblikalyq biýdjetten 191,1 mlrd teńge qarastyrylǵan
Eske sala keteiik, Qazaqstanda kópbalaly otbasylarǵa jańa memlekettik járdemaqy 2020 jyldyń 1 qańtarynan bastap berilip keledi.
