Biyl óńirlerge 807 jedel járdem kóligi satyp alynady. Bul týraly Ulttyq shuǵyl meditsinany úilestirý ortalyǵy basqarma tóraǵasynyń mindetin atqarýshy Baýyrjan Júsipov aitty, dep habarlaidy QazAqparat.
«Qazaqstan boiynsha jedel meditsinalyq kómek qyzmeti 18 derbes jedel meditsinalyq kómek stansysynan, 87 qalalyq kishi stansydan jáne 288 aýdandyq jedel kómek bólimshesinen turady. Respýblika boiynsha jedel kómek shaqyrtýlaryna 1400-ge jýyq jedel meditsinalyq kómek brigadasy qyzmet kórsetedi. Onyń 23 paiyzy mamandandyrylǵan dárigerlik brigada, 77 feldsherlik brigada sanalady», - dedi ol Ortalyq kommýnikatsiialar qyzmetindegi brifing barysynda.
Onyń atap ótýinshe, elimizde sanitarlyq avtokólikpen jabdyqtalý 93 paiyzdy quraidy. Qazirgi tańda 1967 sanitarlyq avtokólik bar. 2019 jyly jedel kómek avtokólikteriniń tapshylyǵyn jabý maqsatynda óńirlerde 293 kólik satyp alyndy.
«Biyl 807 kólik satyp alý josparlanyp otyr. Barlyq kólikter otandyq avtokólik óndirýshilerden lizing aiasynda satyp alynatyn bolady. Qazirgi ýaqytta jedel kómek kólikterin kezeń-kezeńimen daiyndaý jáne jetkizý júrgizilip jatyr. Jalpy barlyq kólikter osy jyldyń qarasha aiynyń sońyna deiin paidalanýǵa beriledi», - dedi Baýyrjan Júsipov.
