Biyl Nur-Sultan qalasynda 24 myń bala birinshi synypqa barady. Segiz mektep úsh aýysymmen jumys isteitin bolady. Bilim salasyndaǵy osy jáne ózge de máseleler jóninde «Habar 24» telearnasyna bergen suhbatynda elorda ákimi Altai Kólginov málim etti, dep habarlaidy QazAqparat.
«Úsh aýysymdy mektep máselesin sheshýdi Elbasy da aitty. Prezidentimiz de qozǵady. Ol tapsyrmany endi oryndaýymyz kerek. Degenmen, statistikaǵa mán bersek, qalamyz tez ósip jatyr. Osydan 10 jyl buryn, iaǵni 2008 jyly qalada 73 mektep, 75 myń oqýshy bolǵan eken. Biyl jańadan salynyp jatqan mektepterdi qosqanda qyrkúiek aiynda 111 mektep bolady. Oǵan 183 myń oqýshy keldi. Tek bir jylmen salystyrar bolsaq, byltyr 1-synypqa 18 myń oqýshy barǵan, al biyl – 24 myń oqýshy. Al ótken oqý jylyn 6 myń oqýshy bitirdi. Al olardyń ornyna tórt ese kóp oqýshy kelip otyr. Mine, qandai aiyrmashylyq», - dedi ol.
A.Kólginovtiń aitýynsha, qala ósken saiyn áleýmettik nysandarǵa da salmaq túsedi.
«Sol sebepti bizde qazir úsh aýysymdy mektepter bar. Ony jasyrmaimyz. Ony sheshý úshin keshendi jospar bekittik. Aldaǵy 5 jyl ishinde 40 mektep salynýy kerek. Bul, biýdjettiń esebinen. Biraq biz biýdjetke qarap otyrmaýymyz kerek. Bul mektep te, balabaqsha da investorlar úshin óte qolaily. Jaqynda biz investitsiialyq keńeste 10-nan astam mektep jeke investorlar esebinen salynatyn jobany qoldadyq. Biz jer beremiz, al investor óz qarjysyna mektep salady. Ol da jaqsy. Áleýmettik másele sheshilgeni memleketke de jaqsy ári óziniń biznes jobasyn júzege asyratyn investorǵa da jaqsy. 30 mlrd teńgege jýyq investitsiia qarastyrylady. Ol jerlerge sheteldik úzdik tájiribelerdi alyp kelemiz. Sebebi, el astanasy bolǵan soń álemniń damyǵan memleketterine qarap boi túzeýimiz kerek. Biz básekelestikke tótep beretin el bolsaq, bilim salasyna kóp kóńil bólýimiz qajet. Bilimniń sapasy bolmasa bizde damý bolmaidy», - dedi ol.
Málim bolǵandai, biylǵy qyrkúiekte segiz mektep úsh aýysymmen jumys isteidi.
«Sol jeke investorlar Singapýrdan bar, Birikken Arab Ámirliginen bar, ózimizdiń qazaqstandyq investorlar bar, eýropalyq, mysal úshin Kembridjdiń nemese basqa da Finliandiianyń tájiribesin iske qosam degen investorlar bar. Sol memlekettiń esebinen jáne investorlardyń esebinen osy máseleni sheshemiz degen jospar bar. Ol endi naqty oryndalatyn jospar. Mysaly, biyldyń ózinde segiz mektep salynyp jatyr. Segiz mektep — jańa mektep, memlekettik biýdjetten ol bes myń oryndy ashady. Al bizde qazir mektepterde on jeti myń bala defitsit bolyp otyr. Iaǵni on jeti myń bala, oǵan tiisti mektep kerek. Sondyqtan osy qyrkúiekte bizde úsh aýysymdy segiz mektep bolady. Biz segiz mektep saldyq deimiz, ol bes mekteptiń úsh aýysymdyq máselesin sheshti. Odan bólek, qazir endi jiyrma tórt myń bala birinshi synypqa kelgennen keiin bizde taǵy qosymsha segiz mektep úsh aýysymdy bolatyn túri bar. Biraq bul — sheshiletin másele. Úsh aýysymdy degen sóz ol endi, árine, bilimniń sapasyna áser etedi. Mysaly úshin keibir mektepterde otyz bes, otyz segiz nemese qyryqqa deiin jetken oryndar boldy. Sol mynaý jańadan salyp jatqan mektepter osy máseleni sheshedi», - dedi ákim.
Elorda basshysynyń sózinshe, bilim salasyndaǵy ózekti máselelerdiń biri –muǵalimderdiń tapshylyǵy.
«Kórip otyrsyzdar, muǵalimderdiń sany kóbeiip jatyr, muǵalimderdi daiyndap úlgerýimiz kerek qoi. Sol sebepti búgin biz pedagogtyń mártebesi jaily zańdy talqylap jatyrmyz. Bilesizder, bul Elbasynyń tapsyrmasy boldy, Prezident qadaǵalap otyrdy. Sondyqtan pedagogtyń mártebesi jaily zań muǵalimge degen úlken memlekettik qoldaýdy kórsetedi. Sonyń biri — turǵyn úi men jeńildikter nemese bir óziniń bilimmen nemese tárbiemen ainalysý kerek, basqa onyń mindetine kirmeitin jumystarmen biz mazalamaýymyz kerek, sondyqtan biz jaqyn arada tek jas muǵalimderge úsh júz elý oryndyq jataqhana beremiz. Sony qazir biz daiyndap jatyrmyz. Sonymen birge biz sertifikat ta berip jatyrmyz. Alǵashqy jarna, Turǵyn úi qurylys jinaq bankine bir million teńgeden eki júz jetpis bes sertfikatty berdik. Sol muǵalimderdi yntalandyrýymyz kerek. Sebebi bilimniń sapasy bolýy kerek deitin bolsaq, muǵalimniń sapasyn arttyrýymyz kerek. Osyndai júieli túrde jumys atqarylyp jatyr», - dedi A.Kólginov.
