kórneki sýret
Elimizdiń barlyq óńirindegi kópbalaly, az qamtylǵan otbasylardan shyqqan 1 myńnan astam bala, onyń ishinde jetim balalar 2021 jyldyń basynan Bilim jáne ǵylym ministrliginiń «Bóbek» ortalyǵynda emdeldi.
Áńgime sozylmaly somatikalyq aýrýlary bar nemese sýyq tiip, jii aýyratyn 8 jastan 13 jasqa deiingi balalar týraly bolyp otyr. Olar 22 kúndik tegin ońaltý jáne saýyqtyrý kýrsynan ótti, dep habarlaidy "Ult aqparat" ministrliktiń baspasóz qyzmetine silteme jasap.
«Biz balalardyń fizikalyq jáne rýhani saýlyǵyna kóp kóńil bólemiz. Ai saiyn áleýmettik osal toptardan shyqqan 100-den astam bala «Ózin-ózi taný» oqý-saýyqtyrý kesheninde emdeledi. Pediatrlar ár balanyń jasyn, fizikalyq jáne psihoemotsionaldyq jaǵdaiyn eskere otyryp, jeke baǵdarlama jasaidy. Emdeý kýrsy terrenkýr, fitoterapiia, galoterapiia (tuz bólmesi), dene shynyqtyrý jáne basqa da jalpy saýyqtyrý sharalaryn qamtidy», — dep atap ótti QR BǴM «Bóbek» Ulttyq ǵylymi-praktikalyq bilim berý jáne saýyqtyrý ortalyǵynyń bas direktory Baian Faizýllina.
Ortalyqta balalarǵa bilim berý boiynsha da qyzmetter usynylady. Saýyqtyrý kýrsy mektep baǵdarlamasy boiynsha oqýmen úilestirilgen. Bul rette «Ózin-ózi taný» adamgershilik-rýhani bilim berý baǵdarlamasyna erekshe kóńil bólinedi. Budan basqa, balalardyń oi-órisin keńeitý úshin Almaty qalasynyń kórikti jerlerinde ekskýrsiialar, sondai-aq balalardyń qyzyǵýshylyqtary boiynsha úiirmeler men shyǵarmashylyq sheberhanalar uiymdastyryldy.
«Aita keteiik, QR BǴM «Bóbek» ortalyǵy balalardy áleýmettik-pedagogikalyq qoldaý jáne tulǵalyq damytý boiynsha jobalardy júzege asyryp jatyr», - delingen QR BǴM baspasóz qyzmeti taratqan aqparatta.
