Biyl kásiptik jáne tehnikalyq kolledjderge túsý emtihandary alynyp tastalady. Bul týraly Nur-Sultan qalasy bilim berý basqarmasy basshysynyń orynbasary Rimma Imanǵazinova ákimdiktiń baspasóz ortalyǵynda aitty, dep habarlaidy QazAqparat.
«Tehnikalyq jáne kásiptik bilim berý uiymdaryna qabyldaý 25 maýsymnan bastalady. Qujattar eki jolmen – «Elektrondy úkimet» veb-portaly nemese tikelei kolledjge júginý arqyly iske asyrylady. Talapkerler 4 oqý ornyna deiin, 4 mamandyq pen biliktilikke deiin tańdaý arqyly orta býyn jáne qoldanbaly bakalavriat mamandyqtaryna ótinish bere alady. Bul talapkerlerge memlekettik tapsyrys boiynsha oryn alýǵa múmkindik beredi. Biyl túsý emtihandary alynyp tastalady. Al konkýrs ortasha ball boiynsha aqparattyq júie arqyly avtomattandyrylǵan rejimde ótkiziledi», - dedi basqarma ókili.
Degenmen mamannyń aitýynsha, pedagogikalyq, meditsinalyq mamandyqtar boiynsha kásiptik-tehnikalyq bilim alýshylar emtihannan múldem bosatylmaidy.
«Pedagogikalyq, meditsinalyq mamandyqtar boiynsha sondai-aq, arnaiy jáne shyǵarmashylyq emtihandardy psihometriialyq testileýde tapsyratyn óner jáne mádeniet mamandyqtary boiynsha túsýshilerge talaptar ózgeshe bolady. Jumysshy biliktilikteri, aspaz, bala kútýshi, tiginshi, dánekerleýshi, santehnik mamandyqtary boiynsha jáne «Eńbek» baǵdarlamasy aiasynda ótinish beretin talapkerler konkýrstan tys kolledjderge suhbattasý arqyly ótedi», - dedi Rimma Imanǵazinova.
