Elordany kóriktendirý jumystarynyń barlyǵy «Nur-Sultan – jaily qala» master-plany tujyrymdamasy aiasynda júrgizilip keledi. Iaǵni, osy sala boiynsha naqty damý kartasy bar. Atalǵan baǵytta atqarylyp jatqan jumys jaily qala ákimi Altai Kólginov «Egemen Qazaqstan» basylymyna bergen suhbatynda málim etti.
Biyl astanada demalys oryndary men jasyl jelekti aimaqtar aitarlyqtai kóbeiedi. Ekologiiany jaqsartyp, turǵyndardyń demalysta ýaqyt ótkizýine qolaily oryndar jasaý úshin qalany kógaldandyrý jalǵasa beredi. Aýlalar men qoǵamdyq keńistikterde (saiabaqtar, skverler, býlvarlar) tal-terek egý ary qarai da júrgiziledi.
«B.Momyshuly dańǵyly boiymen jaǵalaýǵa deiin jaiaý júrginshiler jelekjolyn abattandyramyz. «Tolqyn tárizdi alleia» aýmaǵynda ústel tennisi men shahmatqa arnalǵan ústelder, demalýǵa jáne átkenshek tebýge arnalǵan kóleńkeli aimaqtar ornatýdy josparlap otyrmyz. Bul «Triatlon parkin» jańa bórtegúl baǵymen biriktire otyryp, eko-marshrýt qurýǵa múmkindik beredi. Onda myńnan astam bórtegúl kóshetin otyrǵyzamyz», - dedi ákim.
Ol óz sózinde byltyr Triatlon saiabaǵyn aýqymdy abattandyrý bastalǵanyn atap ótti. Budan bólek, ótken jyly qalada alǵash ret kópirasty alańdar jasaldy. Saraishyq kóshesindegi «Arqar» kópiriniń astynda sportpen ainalysýǵa arnalǵan birneshe aimaq ashylyp, saiabaq aýmaǵynda fýtbol alańdary ornatyldy. Bul – Triatlon men Prezident saiabaqtary arasyndaǵy kópir, ol biyl da jalǵasady.
Sol siiaqty Tuńǵysh Prezident saiabaǵynda kóleńkeli bastyrmalar, átkenshekter, úsh sýburqaq, onyń ishinde tumandy býlaný, oryndyqtar jáne taǵy basqasy ornatyldy. Aldaǵy ýaqytta ózen arqyly velo-jaiaý júrginshi kópirin salý josparlanyp otyr. Bul kópir eki saiabaqty – Tuńǵysh Prezident saiabaǵy men Esil ózeniniń boiyndaǵy saiabaqty biryńǵai klastermen biriktirýge múmkindik beredi. Osylaisha qala turǵyndary aýdandar arasynda kedergisiz júre alady. Kópirdiń boiynda demalys aimaqtary jabdyqtalady, al kópirdiń ishine (astyna) átkenshek ornatylady.
Ázirbaijan Mambetov kóshesi boiynda, qalanyń oń jaǵalaýynda jańa qoǵamdyq keńistik - «Demalys Promenad» jasaldy. Munda Arbat ispetti jaiaý júrginshige arnalǵan keńistik boldy.
«Memleket basshysynyń tapsyrmasy boiynsha qoǵamdyq keńistikterdi (saiabaqtar, skverler, býlvarlar, baqtar) abattandyrý kezinde, kógaldandyrýǵa erekshe nazar aýdaramyz, óitkeni bul – qala damýynyń ajyramas bóligi.
Biylǵy kógaldandyrý jumystarynyń ereksheligi aýlalyq aýmaqtardan, saiabaqtardan, skverlerden, býlvarlardan, eldi mekenderden basqa, kórikti jerlerimizdiń irgeles aýmaqtaryn kógaldandyrýǵa kiriskenimizde. Bul «betondy oryndar» sanyn azaitady. Mysaly Q.Qýanyshbaev atyndaǵy Qazaq mýzykalyq-drama teatry men «Astana Balet» aýmaǵynda jasyl baq, al «Astana Opera» aýmaǵynda emen baǵy, Triatlon saiabaǵynda bórtegúl baǵy ashylady. Qazir barlyq jerde kóshetter otyrǵyzylyp jatyr. Ózim de qalany kógaldandyrýǵa qatysamyn. Qalanyń barlyq aýdanyn, sonyń ishinde eldi mekenderdi kógaldandyramyz», - deidi elorda ákimi.
Jalpy, aǵash egýge qala turǵyndary, eriktiler, kásipkerler de qatysatyny qýantady. Osy jyly 1 millionnan astam jasyl jelek (aǵashtar, butalar, kóshetter jáne t.b.) otyrǵyzýdy josparlap otyrmyz. Qazir qalanyń jasyl túske ainalǵanyn, jańa ekoaimaqtar men «jasyl araldar» paida bolǵanyn kórýge bolady. Eger jyldan-jylǵa sapaly tal egip, kóshet otyrǵyzý josparyn osy deńgeide ustap tursaq, elorda sanaýly jyldar ishinde jasyl qalaǵa ainalmaq. Bir kezderi dalaly jerden turǵan qala baqshaly shahar bolady. 2020 jyly 148 aýla men 60 qoǵamdyq keńistik turǵyndarǵa jańadan paidalanýǵa berildi. Osy jyly 150 aýla men 28 qoǵamdyq keńistikti abattandyramyz.
«Elbasy suqbatynda elordanyń bas jospary ǵimarattardyń, jasyl jelekter men ormannyń simbiozy retinde jasalǵanyn atap ótti. Bul baǵyttaǵy jumystar jalǵastyrylady. Qala turǵyndarynyń qatysýymen senbilikter, ekoaktsiialar turaqty ótkiziledi. Shahardy kógaldandyrýǵa kez kelgen adam úles qosa alady», - dedi Altai Kólginov.
