Elimizde jazǵy shomylý maýsymy qorytyndylandy. Ókinishke qarai, biylǵy shomylý maýsymynda 319 qazaqstandyqtyń ajaly sýdan keldi. Bul týraly QR Tótenshe jaǵdailar ministrligi azamattyq qorǵanys jáne áskeri bólimder komitetiniń basqarma basshysy Qanat Turysbaev málim etti, dep habarlaidy QazAqparat.
«Biylǵy shomylý maýsymynda TJM qutqarýshylary 328 adamdy, onyń ishinde 61 balany qutqardy. Sondai-aq, adamdardyń sýdaǵy qaýipsizdigin qamtamasyz etý maqsatynda TJM ortalyq jáne jergilikti atqarýshy organdarmen ózara is-qimyl jasai otyryp, is-sharalar keshenin ótkizdi. Biyl elimiz boiynsha shomylýǵa ruqsat etilgen 538 oryn belgilendi, bul ótken jylmen salystyrǵanda 93 orynǵa kóp. Odan bólek, jergilikti atqarýshy organdarmen jáne jeke menshik nysandarmen birlesip 454 qutqarý jáne 66 meditsinalyq beket quryldy. Jáne asa qaýipti ýchaskelerde 59 mobildi qutqarý beketi qoiyldy», - dedi Qanat Turysbaev OKQ-de ótken baspasóz máslihatynda.
Onyń aitýynsha, sýda shomylý qaýipsizdigi erejesi men talapqa qaramastan ólim jaǵdaiy tirkelip otyr.
«Sý aidyndarynda 6 655 qaýipsizdik belgisi jáne 1 656 aqparat taqta ornatyldy, onda adamdardyń qaza bolý sebepteri men oqiǵalarǵa yqpal etken jaǵdailar jazylǵan. Bizdiń ministrlik pen memlekettik organdar qabyldap jatqan sharalarǵa qaramastan, shomylý maýsymy kezeńinde sý aidyndarynda qarapaiym qaýipsizdik erejelerin saqtamaǵan 319 adam sýǵa ketip kóz jumdy. Onyń 95-i kámelet jasyna tolmaǵan», - deidi ol.
