Biyl elimizde qiyn jaǵdaida qalǵan 101 myń otbasy anyqtaldy. Bul týraly QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
Ortalyq kommýnikatsiialar qyzmetinde onlain rejimde ótken halyqqa esep berý kezdesýi barysynda Birjan Nurymbetov búginde Eńbek ministrligi birqatar mańyzdy jobany júzege asyryp jatqanyn aitty. Olardyń ishindegi eń mańyzdysy – Qazaqstan halqynyń 100 paiyz, iaǵni 7 mln otbasy qamtylǵan «Otbasynyń áleýmettik kartasy». Osy áleýmettik karta árbir otbasy qandai ómirlik jaǵdaida ekenin, kúrdeli nemese daǵdarystyq ahýaldan shyǵarý boiynsha jumys algoritmin kórsetedi.
«Áleýmettik kartalardy qalyptastyrǵannan keiin kúrdeli jáne daǵdarys jaǵdaiynda bolǵan 101 myń otbasy anyqtaldy. 12,7 myń adamdy jumysqa ornalastyrý, 68,8 myń azamatty emhanalarǵa tirkeý, 72,9 myń balany balabaqshalar men mektepterge tirkeý boiynsha sharalar qabyldandy. 1 451 otbasy kúrdeli jáne daǵdarys jaǵdaiynan shyǵaryldy», – dedi Birjan Nurymbetov.
Miinstr atap ótken taǵy bir mańyzdy joba - «Qazaqstan azamatynyń áleýmettik ID» jobasy. Bul joba áleýmettik járdemaqy alýdyń ashyqtyǵyn, yńǵailylyǵyn arttyrýǵa baǵyttalǵan. Áleýmettik ID bul ataýly áleýmettik kómek, qoǵamdyq kólikte jeńildikpen jol júrýdi tóleýdi, kópbalaly jáne tabysy az otbasylardyń balalaryna mektepterde tegin tamaqtandyrýdy kózdeidi.
«Bul jobanyń pilottyq nusqasy Respýblikanyń 9 óńirinde iske asyryldy. 102 myń ID-karta berildi, 88 myń tranzaktsiia júrgizildi. Bolashaqta biz bul jobany barlyq óńirlerde tolyǵymen qoldanýdy josparlap otyrmyz», – dedi ol.
