Biyl balaly otbasylardy áleýmettik qoldaý shyǵyndary 200 mlrd teńgege artty. Bul týraly QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
«Respýblikalyq biýdjetten jáne Memlekettik áleýmettik saqtandyrý qorynan balaly otbasylardy áleýmettik qoldaýǵa arnalǵan shyǵystar 2019 jylmen salystyrǵanda 2020 jyly 209,5 mlrd teńgege ulǵaidy», - dedi ol Ortalyq kommýnikatsiialar qyzmetinde onlain rejimde ótken halyqqa esep berý kezdesýi barysynda.
Onyń atap ótýinshe, memleket balalary bar otbasylarǵa respýblikalyq biýdjetten beriletin járdemaqynyń 6 túrine kepildik beredi. Áleýmettik saqtandyrý júiesiniń qatysýshysy bolyp tabylatyn jumys isteitin áielder Memlekettik áleýmettik saqtandyrý qorynan júktilik pen bosaný jáne balanyń 1 jasqa deiingi kútimi boiynsha 2 tólem túrin alady. Sondai-aq, dekrettik demalystaǵy áielderge zeinetaqy jarnalary respýblikalyq biýdjetten sýbsidiialanady.
2019 jyly osy maqsattarǵa 372 mlrd teńge, onyń ishinde 200 mlrd teńge – járdemaqy tóleýge, 167 mlrd teńge – MÁSQ-tan áleýmettik tólemderge, 5 mlrd teńge – zeinetaqy jarnalaryn sýbsidiialaýǵa jumsaldy.
«2020 jyly balalary bar otbasylardy qoldaýǵa jalpy 581,5 mlrd teńge, onyń ishinde járdemaqy tóleýge – 389 mlrd teńge, MÁSQ-tan áleýmettik tólemderge – 186,5 mlrd teńge, zeinetaqy jarnalaryn sýbsidiialaýǵa – 6 mlrd teńge baǵyttaý josparlanǵan», – dedi Birjan Nurymbetov.
