Biyl mádeniet baǵytyndaǵy «Abai» telearnasy ashylady. Bul jaiynda QR Prezidenti Ákimshiligi basshysynyń birinshi orynbasary Dáýren Abaevtyń Qazaqstannyń halyq ártisi Talǵat Temenovke áleýmettik jelide jariialaǵan inilik bazynasynda aitylǵan, dep habarlaidy "Ult aqparat".
Aita keteiik, Talǵat Temenov Facebook paraqshasynda QR Aqparat jáne qoǵamdyq damý ministri Aida Balaevanyń atyna jazba qaldyryp, onda tól televideniemizge qatysty oiyn bildirgen bolatyn.
Al búgin sońǵy tórt jylda Aqparat ministri bolǵan, qazirgi qyzmetinde de osy máselemen tikelei ainalysatyn Dáýren Abaev jazbaǵa oi qosyp, halyq ártisiniń kei aitqan tustaryna túsinikteme berýdi ózine mindet sanaǵan.
«Barlyq telearnada kórkemdik keńester bar. Olar efirden beriletin materialdy saralap, suryptap otyrady. Ásirese, memlekettik arnalardyń kórkemdik keńesiniń talaby airyqsha qatal. Árine, jumys tártibiniń ereksheligine, ýaqyt tapshylyǵyna bailanysty beinematerialda qatelikter bolyp turady. Keide beinetýyndy sapasyna qatysty syn aitylyp jatady. Biraq bul – jekelegen jaǵdailar. Únemi qatelik ketedi degendi bildirmese kerek. Ózińizge málim, kino túsirý – jankeshti eńbek pen úlken qarjy qajet etetin uzaq protsess. Táýelsizdik dáýirinde bul salaǵa kóp kóńil bólinip, mol qarajat quiyldy. Nátijesinde edáýir dúnieler jasaldy», - dedi Dáýren Abaev.
Osy oraida ol mysaly retinde «Orbulaq shaiqasy», «Dýlati», «Keiki Mergen», «Qustar áni», «Kelinjan», «Kórshiler», «Qazaq handyǵy. Altyn taq», «Qunanbai», «Abai», «Bekzat», «Qalamger», «Án aǵa», «Bóri», «Arman jolynda», «Abzal jan», siiaqty kóptegen filmder men serialdardy atap ótedi.
«Bul meniń dál qazir esime túskeni ǵana, negizi odan da basqa júzdegen mediatýyndy jasaldy. Únemi este bolatyn taǵy bir nárse – bunyń bári shyǵarmashylyq dúnieler. Sol úshin de bireýge unap, ekinshi adamǵa unamaýy zańdylyq. Biraq, bir anyǵy – osynyń barlyǵy da ÓZIMIZDIKI. Otandyq týyndylar. Kezinde jylyna 1-2 film shyqqanyn jetistik sanasaq, qazir ondaǵan film men serial shyǵyp jatqanyna tań qalmaimyz. Buǵan qýaný kerek dep sanaimyn. Osy rette, mádeniet baǵytyndaǵy «Abai» telearnasyn ashýdy biylǵa josparlap otyrǵanymyzdy aitqym keledi. Jazbańyzda aitylǵan «Súleimen Sultan» serialy da tosynnan túsirilgen týyndy emes. Kóp jyldar boiy básekeniń qazanynda qainap, kásibiliktiń kóriginde qyzǵan dúnie. Sol úshin de tanymal. Buiyrsa, biz de ol deńgeige jetemiz, tipti asyp túsemiz dep sendirgim keledi», - dep túdi D.Abaev.
