Osy jyldyń 5 aiynda 6,3 myń etnikalyq qazaq qandas mártebesin aldy. Bul týraly QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
Ortalyq kommýnikatsiialar qyzmetinde onlain rejimde ótken halyqqa esep berý kezdesýi barysynda ministr 1991 jyldan beri 1 millionnan astam etnikalyq qazaq tarihi Otanyna qaita oralyp, olardyń bári oralman mártebesin alǵanyn atap ótti. Bul elimizdegi halyqtyń 6 paiyzyn quraidy.
«Biyl 1 maýsymdaǵy jaǵdai boiynsha Respýblikamyzǵa 3245 otbasy, 6 361 etnikalyq qazaq kóship keldi. Oralmandar men qonys aýdarýshylardan turatyn jalpy sany 2 224 adamdy quraityn 631 otbasy Shyǵys Qazaqstan oblysy, Soltústik Qazaqstan oblysy, Aqmola, Pavlodar, Qostanai oblystaryna ornalasty», - dedi Birjan Nurymbetov.
Sonymen qatar, ol osy jyldyń 13 mamyrynda Memleket basshysy kóshi-qon protsesterin jetildirý týraly zańǵa qol qoiǵanyn atap ótti. Onda «qandas» túsinigi engizildi. Oǵan sáikes etnikalyq qazaqtyń buryn Qazaqstan Respýblikasynyń azamattyǵynda bolmaǵandyǵy basty ólshem bolyp sanalady. Atajurtyna oralǵan qandastarymyzdyń turaqty turýǵa ruqsat alý úshin de, Qazaqstan azamattyǵyn alý úshin de qujattardy bir ýaqytta usyný quqyǵy bolady.
Sonymen qatar, ministr sheteldik jumys kúshin tartý kvotasy 2019 jylmen salystyrǵanda 40 paiyzǵa azaiǵanyn atap ótti.
«Jyl basynan beri 7,7 myńnan astam sheteldik jumys kúshin tartýǵa ruqsat berildi. Jumys berýshiler 2,8 milliard teńge kóleminde salyq tóledi. Bul rette kadrlardaǵy qazaqstandyq qamtýdy qamtamasyz etý talabyn oryndaityn kompaniialardyń úlesi qazir 96 paiyzdy qurap otyr», -dedi Birjan Nurymbetov.
