Respýblika kásiporyndarynda 15 myń óndiristik keńestiń aralasýymen 318 qaýipti óndiris kózi jumysyn toqtatqan, dep habarlaidy QazAqparat.
Bul týraly QR Bas memlekettik eńbek inspektory Tólegen Ospanqulov ortalyq kommýnikatsiialar qyzmetinde ótken brifingide málim etti.
«Elimizdiń 2,7 myńnan astam kásiporny Eńbek qaýipsizdigi jáne eńbekti qorǵaý standarttaryn engizdi. Respýblika kásiporyndarynda 15 myń óndiristik keńes jumys isteidi. 2020 jyly tehnikalyq inspektorlar eńbek jaǵdailary boiynsha 64 039 tekserý júrgizdi. Onyń barysynda 118 912 buzýshylyq anyqtaldy. Onyń ishinde qaýipsiz eńbek jaǵdailaryn qamtamasyz etý máseleleri boiynsha – 42 704 is tirkeldi. Uiymda eńbek jaǵdailary men qaýipsizdigin jaqsartýǵa baǵyttalǵan 34 434 usynys berilip, 318 jabdyq, mashina, jumys oryndary men óndiristik tsehtardyń jumysy toqtatyldy», - dedi Tólegen Ospanqulov.
Onyń sózine qaraǵanda, atalmysh óndiristik keńester tiimdi ekenin kórsetken.
«Olar anyqtaǵan buzýshylyqtardy joiý nátijesi óndiristik jaraqattanýdy boldyrmaýǵa jáne qaýipsiz eńbek jaǵdailaryn jasaýǵa yqpal etti», - dedi Bas memlekettik eńbek inspektory.
