Biyl 2 myńnan astam esirtki qylmysy tirkeldi

Osy jyldyń 11 aiynda ishki ister organdary 2273 esirtki qylmysyn anyqtap, esirtkini ótkizýdiń 1336 faktisiniń jolyn kesti. Bul týraly QR Ishki ister ministrliginen málim etti, dep habarlaidy QazAqparat.

Vedomstvo málimetinshe, ainalymnan 13 tonna esirtki, onyń ishinde 5,2 kg geroin, 114 kg-nan astam sintetikalyq esirtki tárkilendi. 9 uiymdasqan qylmystyq esirtki tobynyń qyzmeti toqtatyldy. Uiymdastyrýshylar men qatysýshylarǵa qatysty 17 qylmystyq is qozǵaldy, onyń sheńberinde 8 uiymdastyrýshy jáne 45 qatysýshy qylmystyq jaýaptylyqqa tartylady. 15 esirtki zerthanasy joiyldy. 

«Sońǵy eki jylda bul saladaǵy ulttyq zańnama aitarlyqtai pysyqtaldy, esirtkiniń jańa túrlerine baqylaý ornatý tártibi jeńildetildi. Buryn esirtkiniń ár jańa túrin engizý jeke zań qabyldaýdy talap etti. Qazir Ádilet, Densaýlyq saqtaý jáne Ishki ister ministrliginiń esirtki zatynyń qaýiptiligi týraly qorytyndysy jetkilikti. Ol 1-2 ai ishinde Úkimettiń qaýlysymen memlekettiń baqylaýyna engiziledi. Sonyń nátijesinde sońǵy eki jyl ishinde esirtkiniń 115 jańa túrine qatysty qylmystyq jaýapkershilik engizildi», - dep atap ótedi ministrlikten. 

Ministrliktiń atap ótýinshe, 2020 jyldan bastap esirtki qylmystary úshin qylmystyq zańnamaǵa «elektrondyq bailanys júielerin qoldana otyryp» jasalatyn esirtki qylmysy degen jańa túsinik engizildi. Bul quram esirtkini satý, olardy óndirýge arnalǵan zattardyń ainalymyn anyqtaý, esirtkini tutynýǵa tartý faktileriniń jolyn kesý úshin qarastyrylǵan. Bas bostandyǵynan aiyrýdyń uzaq merzimderi belgilene otyryp, qylmystar aýyr jáne asa aýyr qylmystar sanatyna jatqyzyldy. 

Osy jyldyń basynan beri internet arqyly esirtki ótkizýdiń 97 faktisiniń joly kesildi.

Eń aýyr jaza qylmystyq top jasaǵan qylmys, bilim berý uiymdarynda jasalǵan qylmys nemese kámeletke tolmaǵan adamǵa esirtkini satqany úshin kózdelgen. Zań boiynsha mundai qylmystarǵa 15 jyldan 20 jylǵa deiin bas bostandyǵynan aiyrý nemese ómir boiyna bas bostandyǵynan aiyrý jazasy qarastyrylady.