Biyl 17 myń jumyskerdiń eńbek quqyǵy qorǵaldy. Bul týraly QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
«2020 jylǵy qańtar-mamyr ailarynda memlekettik eńbek inspektorlary 2 myńnan astam eńbek quqyǵynyń buzýshylyǵyn joidy. 17 myń jumyskerdiń jalpy somasy 1,7 mlrd teńgeden astam jalaqy bereshegi óteldi», – dedi Birjan Nurymbetov Ortalyq kommýnikatsiialar qyzmetinde onlain rejimde ótken halyqqa esep berý kezdesýi barysynda.
Sondai-aq ol sheteldik jumys kúshin tartatyn 95 kásiporynǵa tekserý júrgizilip, 1 myńnan astam túrli zań buzýshylyqtar joiylǵanyn aitty.
«Taǵy bir mańyzdy másele - eńbekti qorǵaý men qaýipsizdikti qamtamasyz etý. Qazaqstanda 2019-2023 jyldarǵa arnalǵan eńbek jaǵdailary ziiandy jumys oryndary men óndiristik jaraqattanýdy tómendetý jónindegi jol kartasy iske asyrylýda. 14,7 myń óndiristik keńes quryldy jáne eńbekti qorǵaý boiynsha 2,3 myń standart engizildi. Jumyskerlerdiń qaýipsiz eńbek jaǵdailaryn qamtamasyz etý sharalaryna 116 mlrd teńge jumsaldy. Sońǵy 4 jylda qabyldanǵan sharalardyń nátijesinde óndiristik jaraqattanýdyń tómendeýiniń oń serpini baiqalady. Mysaly 2016 jyly 1683 adam zardap shekse, 2019 jyly ol 1431-ge deiin azaidy», - dedi ministr.
Birjan Nurymbetov eńbek qatynastary salasynda áleýmettik seriktestik belsendi damyp kele jatqanyn atap ótti. Atap aitqanda, 126 myń kásiporyn ujymdyq shart jasasty. Onyń ishinde iri jáne orta kásiporyndar 94,7 paiyzdy quraidy. 137 myń kásiporyn jumys oryndaryn saqtaý jóninde memorandým jasady. 205 myń kásiporyn jalaqysy tómen 1,2 mln jumysshylardyń jalaqysyn 32,7 paiyzǵa kóterdi.
Sondai-aq, ol osy jylǵy 14 mamyrda «Qazaqstan Respýblikasynyń keibir zańnamalyq aktilerine Eńbek máseleleri boiynsha ózgerister men tolyqtyrýlar engizý týraly» Zań kúshine engenin eske saldy.
Qujat eńbek sharttaryn esepke alýdyń biryńǵai júiesine jumyskerdiń eńbek qyzmeti týraly aqparatty engizý arqyly kadrlyq is júrgizýdi tsifrlandyrýdy; jumys berýshilerdiń olarǵa laiyqty eńbek jáne turmys jaǵdailaryn jasaý jónindegi mindetteri men jaýapkershiligin belgileýdi; jumys berýshiniń eńbek shartyn birjaqty tártippen buzý quqyǵyn boldyrmaýdy; merzimdi áskeri qyzmet ótkerý kezeńinde azamattardyń jumys ornyn saqtaýdy; qyzmetkerlerdiń quqyqtary men múddelerin qorǵaý úshin kásipodaq qozǵalysyn yntalandyrý jáne kásipodaqtardyń rólin arttyrý maqsatynda kásipodaqtardy qurý tártibin qaita qaraýdy kózdeidi.
