Qyrǵyzstanda «Pitstsa imperiiasy» meiramhanalar jelisinde 318 adam tamaqtan ýlandy, dep habarlaidy QazAqparat Kabar agenttigine silteme jasap.
Zerthanalyq taldaý nátijeleri boiynsha roll-sýshilerdiń daiyn óniminde salmonella bary anyqtaldy. Bul týraly Bishkektiń Memlekettik sanitarlyq-epidemiologiialyq qadaǵalaý ortalyǵynyń bas dárigeri Quban Qundashev málim etti. Aldyn ala málimetke sáikes, salmonella aqserke balyǵynan tabylǵan.
«Meiramhanalar jelisinde bir jetkizýshi bolǵan. Múmkin, balyqtyń búkil partiiasy sondai bolǵan. Qazir «Pitstsa imperiiasy» meiramhanalar jelisi barlyq jaǵdai anyqtalǵanǵa deiin japon taǵamdaryn daiyndamaidy», - dedi ol.
Bishkek qalasy men Shý oblysynyń densaýlyq saqtaý uiymdaryna tamaqtan ýlaný shaǵymymen meditsinalyq kómekke júgingenderdiń jalpy sany 318 adamdy qurady. Bishkek qalasynda astan jappai ýlanýdyń sońǵy jaǵdaiyna bailanysty Memlekettik sanitarlyq-epidemiologiialyq qadaǵalaý ortalyqtarynyń mamandary respýblika boiynsha tamaqtaný oryndaryna tekserý júrgizedi.
