Túrkistan oblysynyń qutqarýshylary Birkólik taý shatqalynda adasqan 3 jasóspirimdi qutqardy, dep habarlaidy "Ult aqparat" QR Tótenshe jaǵdai ministrligine silteme jasap.
«2021 jyly 17 maýsymynda saǵat 17.00 shamasynda 3 jasóspirim Túrkistan oblysy Tóle bi aýdanynyń Ekpindi aýylynan 15 shaqyrym jerdegi «Birkólik» taý shatqalyna kóterilgen. Alaida qarańǵy túsken soń jasóspirimder adasyp, ata-analaryna habar beredi. Ata-analar balalarynyń joǵalǵany týraly «112» nómirine habarlady. Adasqandardyń biri – 2003 jyly týǵan azamat taýǵa kóterilgende qulap, sol aiaǵyn syndyryp alǵan», - deidi TJM resmi ókili Talǵat Ýáli.
Qutqarýshylar dereý oqiǵa ornyna baryp, jaraqat alǵan jasóspirimge alǵashqy dárigerlik kómek kórsetti.
Úsh jasóspirimdi taýdan túsirip, jedel-járdem brigadasynyń qyzmetkerlerine tapsyrdy.
Qutqarý jumysyna Túrkistan oblysy TJ departamentinen 11 qutqarýshy men 3 dana tehnika, jedel-járdem brigadasynan 3 qyzmetker men 1 tehnika jumyldyrylǵan.
«Tótenshe jaǵdailar ministrligi eskertedi! Taýǵa serýenge shyqsańyz, beitanys jermen júrmeńiz, óz kúshińizdi baǵalańyz. Taýǵa shyqqanda yńǵaily kiim kiińiz. Arnaiy aiaq kiim kigenińiz abzal. Taýly aimaq qaýipti ekenin esten shyǵarmańyz», - deidi Talǵat Ýáli.
