Elbasy Nursultan Nazarbaevtyń bastamasymen qurylǵan «Birgemiz» qoǵamdyq qory, qazaqstandyq «SQ-Farmatsiia» úkimettik operatorymen 5 million maska alýǵa kelisim jasady, dep habarlaidy "Ult aqparat".
Buǵan deiin elimizdiń Tuńǵysh Prezidenti Qaýipsizdik keńesiniń otyrysynda koronavirýstyń taralýyna qarsy kúres sharalary aiasynda muqtaj jandardy qajetti qorǵanys quraldarymen, onyń ishinde meditsinalyq maskalarmen qamtamasyz etý qajet ekenin aitqan bolatyn.
Qor tóraǵasy Rýslan Sákeevtiń aitýynsha, satyp alynǵan maskalar koronavirýstan eń kóp zardap shekken qalalar - Nur-Sultanǵa (2 mln. dana), Almatyǵa (2 mln. dana) jáne Shymkentke (1 mln. dana) jetkiziledi.
«SQ-Farmatsiia» kelisim boiynsha atalǵan qalalarǵa maskany 10 kún ishinde jetkizýge mindetti. Bir maska baǵasy onyń qalalarǵa jetkizilý qunyn qosa eseptegende 118 teńgeni quraidy. Sondai-aq, satyp alynǵan maskalardyń sapasyna da «SQ-Farmatsiia» jaýapty. Óz kezeginde, ákimdikter buǵan deiin qormen jasasqan memorandýmǵa sáikes, maskalardyń taratylǵany týraly esep bere otyryp, olardyń tiisti meken-jailarǵa ýaqytyly jetkizilýin qamtamasyz etýi kerek.
«Maska eń aldymen, turǵyndardyń virýs juqtyrý qaýpi joǵary álsiz toptaryna, onyń ishinde jalǵyz basty qarttarǵa, kópbalaly jáne az qamtylǵan otbasylarǵa, jetim balalarǵa, UOS ardagerlerine jáne olarǵa teńestirilgenderge, tyl eńbekkerlerine, erekshe qajettilikteri bar azamattar men múmkindigi shekteýli balalardy kútýshi adamdarǵa arnalǵan», - deidi Rýslan Sákeev.
Eske sala keteiik, «Birgemiz» qoǵamdyq qory Elbasynyń bastamasymen koronavirýsqa qarsy kúres jaǵdaiynda halyqtyń muqtaj toptaryn qoldaý maqsatynda quryldy. Búginde qorǵa 13 milliardtan astam teńge tústi. Kómek alýshalardyń tizimderin naqtylaý úshin ákimdikter jáne áleýmettik qamsyzdandyrý mekmelerimen belsendi jumys júrgizilýde.
Kórsetilgen kómektiń barlyq túrleri men túsken qarajat boiynsha uiymnyń saitynda jáne áleýmettik jelilerde udaiy aqparattar jariialanyp, jurtshylyqqa turaqty túrde esep beriledi.
