«Birgemiz» qory Nur-Sultan jáne Almaty qalalarynyń dárigerlerin qoldaýǵa 100 mln teńgeden astam qarajat baǵyttaidy, dep habarlaidy "Ult aqparat" qordyń baspasóz qyzmetine silteme jasap.
Bul týraly Elbasy Nursultan Nazarbaevtyń bastamasymen koronavirýspen kúres jaǵdaiynda halyqtyń áleýmettik álsiz toptaryna qoldaý kórsetý úshin qurylǵan «Birgemiz» qoǵamdyq qory qamqorshylyq keńesiniń otyrysynda belgili boldy.
Qamqorshylyq keńestiń tóraǵasy, «Nur Otan» partiiasy Tóraǵasynyń Birinshi orynbasary Baýyrjan Baibek atap ótkendei, bastapqyda qor qarajatyn 100 myń muqtaj azamatqa taratý josparlanǵan. Áitse de, búginde óńirlerden túsken ótinishter sany aitarlyqtai ósken, al partiianyń onlain resýrsyna kómek surap habarlasýshylar sany – eki esege artqan.
«Elbasy Nursultan Nazarbaevtyń tapsyrmasy boiynsha qor qarajaty qarapaiym qazaqstandyqtarǵa ataýly kómek kórsetýge jumsalady. Bul beriletin kómektiń árbir janǵa derbes belgilenýin qamtamasyz etedi. Memleket basshysy Qasym-Jomart Toqaevtyń bastamasymen qolǵa alynǵan «Birgemiz» aktsiiasynyń aiasynda qor halyqtyń áleýmettik álsiz sanatyna kiretin muqtaj jandarǵa 50 myń teńgeden aýdarady. Birinshi kezeńde qarjylyq qoldaýdy 150 myńnan asa muqtaj azamat alady, ol 7,6 mlrd teńgeni quraidy», - dedi Baýyrjan Baibek.
Qor tóraǵasy Rýslan Sakeevtyń málimetinshe, materialdyq kómek ekinshi deńgeidegi bankter arqyly jeke tulǵalardyń kartochkalaryna nemese aǵymdaǵy esepshottaryna qolma-qol emes aqshalai túrde aýdarý jolymen kórsetiledi. Qazirgi ýaqytta materialdyq kómekti aýdarý kezinde odan komissiia almaý máselesi qarastyrylýda. Sonymen birge bul qarajattyń kreditteri boiynsha qaryzy bar azamattardyń bereshegin óteý úshin ustalyp qalmaýy da pysyqtalýda.
«Eshqaida barýdyń, eshqandai ótinish jazýdyń qajeti joq. Taiaý kúnderde atalǵan qarajat óńirlik qorlarǵa aýdarylyp, ári qarai ol adamdardyń esepshotyna túsedi. Bul úshin biz aldyn ala búkil óńirlermen tiisti memorandýmdarǵa qol qoiǵanbyz. Eńbek jáne halyqty áleýmettik qorǵaý ministrliginiń usynymdarynyń negizinde kómek qarajatty alýshylardyń 7 sanaty bekitilgen. Ákimder atalǵan sanattar boiynsha kómek alýshylar tizimin usyndy. Olardyń qatarynda turmysy tómen kópbalaly otbasylar, muqtaj múgedekter, múgedek balany tárbielep otyrǵan otbasylar, eń tómengi zeinetaqy alyp júrgen jáne halyqtyń áleýmettik álsiz tobyna jatatyn zeinetkerler, jetim balalar (tuldyr jetim balalar men asyraýshysynyń birinen airylǵan balalar), Uly Otan soǵysyna qatysýshylar men solarǵa teńestirilgender, tyl eńbekkerleri bar. Bul rette atalǵan árbir sanatta muqtaj jandar da, sonymen birge kómekti qajet etpeitinder de bar ekenin atap ótken jón. Sondyqtan biz tizimdi tikelei jergilikti jaǵdaidy jaqsy biletin ákimdikterden aldyq. Atalǵan kómek oblys ortalyqtary men koronavirýs taralý qaýpi joǵary iri qalalardyń turǵyndaryna kórsetiledi. Osy jáitter eskerile otyryp, 23 qala anyqtaldy» , - dedi Rýslan Sakeev.
Májilis barysynda qordyń qamqorshylyq keńesi Nur-Sultan jáne Almaty qalalarynyń indetke qarsy is-sharalarǵa tartylǵan 2 myńdai meditsina qyzmetkerine materialdyq qoldaý kórsetý úshin 100 mln teńgeden astam qarajat bólý týraly usynysty qoldady. Taiaý ýaqytta qor basshylyǵy qos qalanyń ákimdikterimen birlesip qarajatty taratý tetikterin tujyrymdaidy jáne 50 myń teńge kóleminde birjolǵy tólem alatyn meditsina qyzmetkerleriniń tizimin ázirleidi.
Jalpy búgingi kúni «Birgemiz» qoǵamdyq qorynyń esepshotyna 13,2 mlrd teńgeden astam qarajat tústi. Kúni keshe qor úkimettik operator «SK-Farmatsiia» kompaniiasymen 5 million maska satyp alý týraly shartqa qol qoidy. Bul maskalar Nur-Sultan, Almaty jáne Shymkent qalalary turǵyndarynyń áleýmettik jaǵynan eń álsiz toptaryna taratylady.
Jinaqtalǵan qarajat týraly aqparatty jáne óńirler boiynsha bólinetin kómekti baqylap otyrý úshin qor birgemiz2020.kz resmi saityn iske qosty.
