Belsendi Janbolat Mamai men onyń áieli Inga Imanbaiǵa qatysty azamattyq-protsessýaldyq sot sońyna jetti. 1,5 aiǵa sozylǵan protsess barysynda erli-zaiyptylar ózderin qorǵaityn birde-bir dálel keltire almai, sotta jeńildi.
Eske salaiyq, 13 sáýirde Mamai men Imanbai ózderiniń YouTube kanalynda Nur Otan partiiasy Tóraǵasynyń birinshi orynbasary Baýyrjan Baibekti jemqor dep aiyptap, birneshe videomaterial ázirlegen bolatyn. Artynsha Baýyrjan Baibek suhbat berip, óziniń ar-namysyn zań aiasynda qorǵaitynyn málimdedi.
30 sáýirden bastalǵan azaimattyq-protsessýaldyq sot protsesi kezinde Mamai men Imanbai jaýap berýshi tarap retinde videoda aitqan derekterine dálel keltirýi kerek bolǵan. Alaida, olar jaýap qujattaryn ózderine berilgen ýaqytta emes, birneshe kúnge keshiktirip ákelip, saldarynan protsess birneshe ret keiinge qaldyrylǵan.
Mamai men onyń qorǵaýshylary sotqa usynǵan 1,7 myń bettik qujattardy tekserip shyqqan zańger Aijan Táshenova (B.Baibektiń múddesin sotta qorǵap jatyr – avt.) onyń birde-biri resmi qujat emes ekenin, sondyqtan olardy dálel retinde qaraýǵa bolmaitynyn aitty. Onyń sózinshe, erli-zaiyptylardyń dálel dep jinap ákelgen qujattarynyń kóbi áleýmettik jelidegi jazbalar, BAQ betterindegi maqalalar, anonimdi telegram-kanaldardyń siltemesi bolǵan.
Búgin Áýezov aýdandyq №2 sotta sýdia Raihan Sartaeva da Janbolat Mamai men onyń áieli Inga Imanbaevanyń videomaterialdary jala ekenin rastap, Baýyrjan Baibektiń shaǵymyn qanaǵattandyrdy.
Osylaisha, Nur Otan partiiasy Tóraǵasynyń birinshi orynbasaryna qatysty jalǵan aqparat taratqany úshin Janbolat Mamai men Inga Imanbai sotta qaralǵan videomaterialdardyń bárin internetten óshirýge jáne onda aitylǵan derekterdi joqqa shyǵarýǵa mindetteldi. Sonymen qatar, erli-zaiyptylar 876 myń teńge kólemindegi sot shyǵyndaryn da óteýi tiis.
Eske salaiyq, keshe atalǵan is boiynsha ótken negizgi protsess shamamen jarty kúnge sozylyp, sýdia eki taraptyń da sózin tyńdady. Sóztalas kezinde Mamai da, Imanbai da taqyryptan aýyp, Baýyrjan Baibekke múldem ózge aiyptar taqty. Al, suraq-jaýap kezinde Janbolat Mamai zańger Aijan Táshenovanyń saýalyna jaýap berýden bas tartyp, ol úshin qorǵaýshylary sóiledi.
