Keshe elimizde 3 bala kópqabatty turǵyn úidiń terezesinen qulap ketken, dep habarlaidy "Ult aqparat" TJK baspasóz qyzmetine silteme jasap.
«2 qyrkúiekte elimizde balalardyń terezeden qulaýyna qatysty 3 oqys oqiǵa tirkeldi. Máselen, Nur-Sultan qalasynda J.Nájimedenov kóshesindegi toǵyz qabatty turǵyn úide besinshi qabattaǵy páterdiń terezesinen eresekterdiń qaraýynsyz qalǵan 4 jasar bala qulap ketti. Ol aýrýhanada kóz jumdy.
Aqtaýda bes qabatty turǵyn úide eresekterdiń qaraýynsyz qalǵan 3 jasar bala besinshi qabattaǵy páterdiń terezesinen qulady. Bala túrli jaraqattarmen aýrýhanaǵa jatqyzyldy.
Pavlodar oblysynyń Qalqaman aýylynda tórt qabatty úidiń tórtinshi qabatyndaǵy terezesinen 4 jastaǵy bala qulap ketti. Ol da túrli jaraqattarmen aýrýhanaǵa jatqyzyldy», delingen habarlamada.
Qutqarýshylardyń aitýynsha, oqys jaǵdaiǵa ata-anasynyń balany qaraýsyz qaldyrý nemese qasyndaǵy eresekterdiń salǵyrt qaraýy sebepshi bolady. Sondai-aq kóbinese bul kúndizgi ýaqytta bolady.
Tótenshe jaǵdailar komiteti osyndai jazataiym oqiǵalardyń aldyn alý úshin azamattardy kishkene balany jalǵyz qaldyrmaýǵa; qulap ketýden qorǵaýǵa arnalmaǵan masa toryna (moskit) senbeýge, tereze ashqanda balany nazardan tys qaldyrmaýǵa shaqyrady. Sonymen qatar, balanyń tereze aldyna shyǵyp ketpeýi úshin jihaz ben tósekti terezeden alysyraq qoiý kerek.
