QR Bilim jáne ǵylym ministrliginiń Facebook-tegi paraqshasynda ministr Ashat Aimaǵambetovtiń muǵalimderdi quttyqtaǵan videosy jariialandy, dep habarlaidy QazAqparat.
«Qymbatty áriptester! Sizderdi kásibi merekelerińiz – Muǵalimder kúnimen shyn júrekten quttyqtaimyn. Muǵalim mamandyǵy - búkil álemdegi eń qurmetti, eń asyl mamandyqtyń biri. Sizder balalardy bilim nárimen sýsyndatyp, olarǵa tálim-tárbie berý barysynda, iaǵni elimizdiń damýyna baǵa jetpes úles qosyp kele jatyrsyzdar. Óitkeni muǵalim balalardy bilim álemine jeteleidi ári keiingi býyn ókilderin tárbieleidi», - dedi ministr.
Onyń aitýynsha, pandemiia muǵalim jumysynyń mańyzdylyǵyn aiqyndap bergen.
«Ata-analar balalardy oqytý qanshalyqty qiyn ekenin túsinip, sezinip, muǵalimniń oqýshy ómirinde mańyzdy oryn alatynyna taǵy da bir márte kóz jetkizdi dep aita alamyn. El Prezidenti Qasym-Jomart Kemeluly Toqaevtyń qoldaýynyń arqasynda muǵalimderdiń jalaqysy artyp, jańa qosymsha aqylar men sanattar paida boldy. Biz muǵalimderdi ózine tán emes fýnktsiialardan jáne qaǵazbastylyqtan aryltý úshin júieli ári naqty sharalar qabyldadyq. Pedagog mártebesin kóterý boiynsha ári qarai da jumysty jalǵastyramyz», - degen vedomstvo basshysy biyl táýelsizdiktiń 30 jyldyǵy ekenin eske saldy.
«Osy ýaqyt aralyǵynda elimizde aitarlyqtai úlken-úlken ózgerister boldy. Bilim berý júiesi de ózgerdi. Bilimimizdi shyńdap, jańa daǵdylardy igerdik. Bul jetistikterge qol jetkizýde bizdiń áriptesterimiz – muǵalimderdiń eńbegi men kásibiliginiń úlesi óte zor. Qymbatty áriptester, sizderdi kásibi merekelerińizben quttyqtap, zor densaýlyq, sarqylmas kúsh-qýat, shabyt, shyǵarmashylyq tabys tileimin. Qymbatty áriptester! Qajyrly eńbekterińiz, shydamdylyqtaryńyz jáne balalarǵa degen súiispenshilikterińiz úshin alǵys aitamyn. Mereke qutty bolsyn», - dedi Ashat Aimaǵambetov.
