Elektrondyq eńbek birjasynda qyrkúiek aiynda kásiporyndar tarapynan kadrlarǵa, sondai-aq jumys izdep júrgen adamdarǵa suranystyń ósimi baiqaldy. Bul týraly QazAqparat «Eńbek resýrstaryn damytý ortalyǵyna» silteme jasap habarlaidy.
Ortalyqtyń habarlaýynsha, qyrkúiekte Elektrondyq eńbek birjasyna 137,9 myń bos jumys orny (+22%) jáne 62,2 myń túiindeme (+8%) ornalastyryldy. Oqý jylynyń bastalýyna bailanysty bos oryndardyń eń kóp sanyn bilim berý salasyndaǵy uiymdar bergen. Qyrkúiek aiynda da bilim berý salasyndaǵy mamandarǵa degen suranys artyp otyr – 18 myńnan astam bos jumys orny, bul mektepterde, kolledjderde jáne JOO-larda dástúrli oqytý formatyna qaita oralýǵa bailanysty bolyp otyr.
Bilim berý júiesi úshin kadrlarǵa maýsymdyq qajettilikpen qatar naryqta ot jaǵýshylarǵa, qazandyq operatorlary men qazandyq mashinisterine (ot jaǵýshylar) suranystyń ósýi baiqalady, olar úshin ótken aiǵa qaraǵanda ósim 2,9 myńǵa jýyq bos oryndy qurady. Al qyrkúiek aiynda olarǵa degen jalpy qajettilik 3 myńnan astam bos oryndy qurady.
Osy aida suranys serpinine áser etken taǵy bir faktor Qazaqstan halqynyń jalpyulttyq sanaǵy boldy. Máselen, EEB-da 7,8 myń interviýer bos orny jariialandy, tamyz aiymen salystyrǵanda ósim 5,3 myńdy qurady, óńirler bólinisinde interviýerler úshin bos oryndardyń eń kóp sany Túrkistan, Shyǵys Qazaqstan, Almaty jáne Jambyl oblystarynda ornalastyryldy.
