Bilim jáne ǵylym ministri Ashat Aimaǵambetov jyl sońyna deiin muǵalimder úshin asa mańyzdy qujat qabyldanýy múmkin ekenin málimdedi, dep habarlaidy Sputnik Qazaqstan.
"Bizdiń parlamenttegi jumysymyz áli aiaqtalǵan joq. Sátin salsa, beisenbi kúni senatqa baryp, birneshe zańdy depýtattardyń qaraýyna shyǵaraiyn dep jatyrmyz. Sonyń ishinde "Pedagog mártebesi týraly" zań jobasy da bar. Bul zań biz úshin mańyzdy, memleket úshin mańyzdy, bizdiń áriptesterimiz – muǵalimder úshin asa mańyzdy. Sondyqtan osy zań qabyldansa, kelesi jyly biraz sharýany iske asyramyz", - dedi Aimaǵambetov jýrnalisterge bergen suhabatynda.
Ministrdiń aitýynsha, "Pedagog mártebesi týraly " zań qabyldanýy tiis. Ol úshin senat ony birden eki oqylymda maquldaýy qajet. Odan keiin zańǵa memleket basshysy qol qoiady.
"Pedagog mártebesi týraly" zań ázirlendi
Bilim jáne ǵylym ministrligi "Pedagog mártebesi týraly" zań jobasyn ázirlep, májilistiń qaraýynan ótkizdi. Osy qujattyń negizgi baǵyttary:
-
Halyqaralyq olimpiadalardyń, konkýrstar men sport jarystarynyń jeńimpazyn, júldegerin daiyndaǵan pedagogke úsh laýazymdyq ailyq mólsherinde birjolǵy syiaqy tóleý;
-
"Qazaqstannyń eńbek sińirgen ustazy" qurmetti ataǵymen marapattalǵan pedagogke 1000 eselengen ailyq eseptik kórsetkish mólsherinde (2019 jyly 2,5 million teńgege teń) birjolǵy tólem berý;
-
2021 jyldyń 1 qyrkúieginen bastap mektep muǵalimderi úshin normativtik oqý júktemesin 18 saǵattan 16 saǵatqa deiin tómendetý;
-
Magistr dárejesi úshin 10 eselengen ailyq eseptik kórsetkish mólsherinde (25 250 teńge) qosymsha aqy engizý;
-
Aýyldyq jerlerde jumys isteitin muǵalimderge jeke turǵyn úi qurylysy úshin jer ýchaskelerin berý.
Prezident Qasym-Jomart Toqaev aldaǵy tórt jyl ishinde muǵalimderdiń eńbekaqysyn birtindep eki ese arttyrýdy tapsyrdy. Osylaisha, kelesi jyldan bastap ustazdardyń jalaqysy 25 paiyzǵa ósedi.
