Aldaǵy 4 jyl ishinde jyl saiyn 200 mektep salynatyn bolady. Bul týraly Memleket basshysynyń Joldaýynda berilgen tapsyrmalardy oryndaýǵa arnalǵan Úkimet otyrysynda Bilim jáne ǵylym ministri Ashat Aimaǵambetov málim etti, dep habarlaidy QazAqaparat.
«Prezidenttiń tapsyrmalaryn júzege asyrý baǵyttaryna toqtalǵan ministr: «Birinshiden, 1000 jańa mektep qurylysy boiynsha atap óteiin. Boljamǵa sáikes 2025 jyly ýrbanizatsiia men týý deńgeiiniń ósýine bailanysty mekepterde qosymsha 993 myń orynǵa qajettilik paida bolady. Sondyqtan oryn tapshylyǵyn boldyrmaý úshin 1 myń jańa mektepti salý 4 negizgi mehanizm arqyly iske asyrylady: memlekettik biýdjetten nysanaly qurylys, memlekettik-jekemenshik áriptestik tetigi, jekemenshik mektepter jelisin damytý, modýldik mektepter salý», - dedi.
Onyń aitýynsha, josparǵa sáikes biylǵy jyldyń ózinde 200 jańa mektep iske qosylady. Kelesi 4 jyl ishinde jyl saiyn 200 mektep salynatyn bolady.
«Jergilikti atqarýshy organdar osy 1000 mektepti salý úshin qajetti jer ýchaskelerin aldyn-ala bólip, onyń interaktivti kartasyn ázirleýi qajet. Oǵan qosa 1500, 2000, 2500, 3000 oqýshyǵa arnalǵan mektepterdiń zamanaýi tiptik jobalaryn daiyndaý kerek dep esepteimiz. Osy tapsyrmanyń oryndalýyna qoǵamdyq baqylaý júrgizý úshin arnaiy elektrondyq portal iske qosylady», - dedi ministr.
